Komîsyonî eşkerayîya xo ya nuştekî de vat ke sîstemê perwerdeyî yê Tirkîya wexto ke serra newîye ya perwerdeyî dest pêkena, bi krîzanê zafhetan reyde rî bi rî yo, feqîrîya gedeyan, kêmîya budceyî, tîcarîkerdişê perwerdeyî, karkerkerdişê gedeyan û polîtîkayê cinsîyetperestî û gamanê tewr manadaran ê çareserîya nê krîzan ra yew naskerdişê îmkanê perwerdeyê bi ziwanê dayike seba bi mîlyonan gedeyan o: “Ewro verê heme gedeyê kurdan, bi mîlyonan gedeyî bê nê îmkanî dest bi cuya perwerdeyî kenê; la perwerdeyê bi ziwanê dayike garantîya averşîyayîşê gedeyî ya sey ferdêko azad, bi nasname, ziwan û kulturê xo.”
Ganî perwerde bi ziwanê dayîke de bêro dayene
Eşkerayîye de ame vatene ke Prosesê Haştî û Komelê Demokratîkî nîzamêko demokratîk hedef gêno ke her ferd û komel tede bi heqanê xo yê xozayîyan bi hemwelatîya seypê û birûmete pîya ciwîyenê; coka garantîya qanûnî û destûrî ya heqê perwerdeyê bi ziwanê dayike gamanê tewr muhîman ê haştî û vurîyayîşê demokratîkî ra yew a. Heqê “dersa weçînayîşî” ya di saetan destkewteyêko muhîm ê têkoşînê serran o, la gama eslî ke ganî ser o bêro awankerdene, kerdişê ziwanê dayike ziwanê perwerdeyî û garantîkerdişê ci yo.
No heq amênê haştîya komelkî yo
Komîsyonî bale ante ke teda û hêrişê peyênî yê vera dezgehanê ziwanê kurdkî û qiseykerdoxanê kurdkî provokasyonan rê war akenê û vernîgirewtişê ney tena bi seypêyîyêka rastikêne ya mabênê ziwanan mumkun o: “Heqê ziwanê dayike ma parçe nêkeno, eksê ci, ma yew keno. No heq amênê haştîya komelkî yo û heqêk o ke fek ci ra nêverdîyeno. Ma verê heme TBMM’yî, dezgehanê îdarî û sîvîlan û heme komelî dawet kenê ke seba naskerdişê heqê perwerdeyê bi ziwanê dayike berpirsîyarîyêka tarîxî bigîrê.”
