Sêwreg de otomobîl da cinîya ke 15 rojî verî weledîyabî ro: Cinî merde

Qeza, rayîrê Sêwreg-Amedî ser o, nezdiyê Mehleya Şîrînkuyuyî de ameye meydan. Otomobîlo bi pîlakaya 47 NN 447î yo ke şofêrê ey hema bellî nîyo, da C.E.ya 30 serre ro ke waştêne rayîrî ra bivîyaro.

Cinî bi tesîrê pirodayîşî erzîya kişta rayîrî ser. Ekîbanê weşîye yê ke ameyî cayê hedîseyî, kontrolanê xo de tesbît kerd ke cinî merda.

15 rojî verê cû doman ardibi dinya

Ame musayîş ke C.E.ya ke dayîka 3 domanan bîye, 15 rojî verê cû domanêko newe ardibi dinya. Mergê na dayîka cîwane, merdimanê aye qehir kerd.

Cenazeya C.E., dima ke cayê hedîseyî de cigêrayîş ame kerdene, seba otopsî ameye berdene morgê Nêweşxaneyê Dewlete yê Sêwregî. Şofêrê otomobîlî hetê ekîbanê polîsan ra ame destbend kerdene û derheqê hedîseyî de tehqîqat dewam keno.