ZAZAKÎ NEWS - Amedsporî bi amancê peydakerdişê paştgirîye seba klubî dest bi kampanyaya SMSî ya hîra kerd
Kampanya Tesîsê Şehmus Ozerî yê Amedsporî de raya pêroyî rê amey eşkere kerdiş.
Kombîyayîşê lansmanê kampanyaya paştgirîye de; Serekê Amedsporî Burç Baysal, Serekê Desteya Şêwirmendîya Berze Mehmet Kaya, desteya teknîkî û futbolîstî amade bîyî.
"Amanca ma 50 mîlyon Lîreyê Tirkî ya"
Serekê Amedsporî Burç Baysalî kombîyayîş de îfade kerd ke kampanya ke demêko derg o yena plankerdene, nika yena bica kerdene û amanca înan 50 mîlyon Lîreyê Tirkî ya.
Burç Baysalî wina dewam kerd, "Ma sey keyeyê Amedsporî, seba lansmanê kampanyaya SMSî ya ke ma bawer kenê do seba kluba ma bibo paştgirîyêka girde, ma şima dawet kerdî tîya.
Ma seba sebebanê teknîkî zaf serran bi ke nêeşkayêne destûra bexşî bi rayîrê SMSî bigirotêne.
Hewldayîşê ke hetê îdarekaranê verêne ra amebî destpêkerdene, wextê ma de bi encam bi û ewro kampanyaya ma şeklêko resmî de dest pêkerd.
Ma her hîrê operatoranê mobîlî yê girdan yê Tirkîya reyde pîyameyîş îmze kerdê.
Do mumkun bo ke heme operatoran ra eynî kodî reyde paştgirî bêro dayene.
Ma venga hevalê pêrune ke zerrîya xo daya kluba ma danê ke paştgirîye bidê na kampanya.
Ez hêvî kena kampanyaya ma seba komelê Amedsporî bi xêr bo."
"Amedsporî tîma şarî ya"
Serekê Heyeta Şêwirmendîya Berze ya Amedsporî Mehmet Kaya zî lansman de qisey kerd û va:
"Wayîrê Amedsporî şar o. Na klub bi paştgirîya şarî biya pîl û ewro amanca Lîga Super de resayo pozîsyonêka hewle.
Seba ke ma biresê na amance, ganî hêza ekonomîye bibo.
Ma kampanyayanê nê tewiran de her tim şarê xo û karkerdeyê xo hetê xo de dîyê.
Bi taybetî ma pawenê ke 25 hezar endamanê Odaya Bazirganî û Pêşesazîye ya Amedî (DTSO) yê ke paştgirîyêka pêt bidê na kampanya."
Çarçewa kampanyaya SMSî ya ke Amedsporî daya destpêkerdene de, do tereftarî bi rayîrê her hîrê operatoranê girdan yê Tirkîya, bi xebitnayîşê eynî kodê kilm-peyamî bieşkê paştgirî bidê klube.
Amedsporî çarçewa kampanya de bi qasê 50 mîlyon lîreyê Tirkî hedefê bexşkerdişî eşta verê xo.
