Çarçiweya tehqîqatê ke seba vîndîbîyayîşê Gülistan Doku yeno rayberdiş de, gumanbaranê ke ameybî destbendkerdiş ra çar polîsî ameyî tewqîfkerdiş, derheqê hîrê gumanbaran de zî qerarê caardişê tedbîrê kontrolê adlîyî ame dayîş.
Dêrsim de, çarçiweya tehqîqato ke seba vîndîbîyayîşê wendekara unîversîteye Gülistan Doku yeno rayberdiş, operasyonêko hîra ame kerdiş. Operasyono ke mîyanê înan de mudirêkê asayîşî, amîrêkê asayîşî, serkomîserêk, komîserêk, 10 polîsî, karkerêkê komputerî û hîrê polîsê teqawutî estbî, derheqê 19 gumanbaran de muamele ame kerdiş û nînan ra 18 kesî ameyî destbendkerdiş.
Heşt gumanbarê ke karê înan ê cendirmeyan qedîyay, sevqê Edlîyeya Erziromî ameyî kerdiş û îfade day dozgerê cumhurîyetî. Dozgerîye, dima ke kare dayîşê îfade qedîya, seba tewqîfkerdişê şeş kesan û seba yew kesî zî bi waştişê kontrolê adlîyî sevqê hakimîya cezayî ya sulhî kerd; gumanbarêk zî serbest ame veradayene.
Netîceya erjnayîşo ke hetê hakimîya cezayî ya sulhî ya nobedare ra ame kerdiş, çarçiweya tehqîqatî de, gumanbaranê ke sevqê hakimîye ameybî kerdiş ra çar polîsî ameyî tewqîfkerdiş.
