Amedspor yew taximê futbolî ra zêder o û zerrîya pêrûna Kurdan de vile akerda. Û ma gere ma awe bide a vile ke wa biba xişne.
Amedspor peynîya nê hewteyî de keyeyê xo de verê tereftaran û heskerdoxanê xo de Karaman FK reyde ame têver. Nêzdîyê 25 hezaran heskerdoxê Amedporî, taximê xo tena nêverday û ameyî maç temaşe kerdî.
Ez bi xo zî no hewte şîya maç û seke festîvalê fûtbolî estbi Amed de. Hezaran heskerdoxê Amedporî pê coşêko pîl herîkiyayê stadyûm. Hema vaje stadyûm de ca nêmendbi. Heskerdoxê Amedporî hetanî peynîya maçî pê sloganan hetkarîye day taximê xo. Qij ra pîl hezaran kesî pê hîsanê xo yê wertaxan pê sloganan maç temaşe kerd.
Çîyo ke pê keyfê mi ame, mîyanê stadyûm de deyîrê Kurdkî ameyêne cenayîş. Wexto ke deyîrî dest ci kerdêne terefdarî yew fek ra pîya ê deyîrî vatêne. Rind bi ke Amedspor 4-1 serkewt û no hewte bi lîderê Lîga Diyîne ya Sûre ya TFFyî.
Dîyarbekir şaristanêko birîndar o û bi serrano ke zaf dejî antî. Heqê ci esto ke tay keyf biko. Semedo ke Amedspor bîyo wesîle ke hende kesî ameyê têhet û pîya keyf kerdê ma Amedsporî rê zaf sipas kenê. Na dinya de derdî zî dejî zî estî la gere merdim tay keyf zî biko. Peynîya derd û dejan nêna xora...
Merdim ayîdê grûbêk bo û pê a grûbe keyfeş yan xemgîn bibo encax o wext beno merdim. Tewir tewir grûbî estî û însanî pê înan yenê têhet û derdorê armancanê wertaxan de rayîrê xo ra şinê.
Sîyaset, tarîqat, edebîyat, muzîk, huner, futbol û kar û gure nê grûban ra grûbê esasî yê mîyanê cimatî de. Ma Kurdî semedo ke şarêko bindest ê tewr zaf meylê ma sîyaset ser o yo. Ma sîyaset dir zêde ra eleqedar ê. Hema vaje qijê ma zî pêro sîyasetî ra fehm kenê û eşkenê sîyaset ser o pê saetan qisey bikê. Mi gore no normal o zî. Semedo ke ma biresê heqanê xo yê sîyasî û kulturî gere sîyaset bêro kerdiş zî.
La sîyaset tim bêro kerdiş merdim beno huşk, çimê merdimî pê ê sîyasetî gêrîyenê û nika tay merdimî estê ke mîyanê ma de rîyê sîyasetê xo yo ke kenê ra bîyê kor!
Ayra taximê futbolî Amedspor sîyaset ser yew organîzasyon o û her tewir merdimî, her ca ra merdimî, her het ra merdimî tira hes kenê, wayîrê ci vejîyenê û derdorê ci de yenê têhet.
Amdspor tena taximêkê futbolî nîyo hînî. Hînî bîyo nasnemeyê nê bajarî û raşta ci nê bajarê qedîmî rê wîna yew taximê futbolî lazim o.
Ma hêvî kenî serbikewo, bibo şampîyon û hîna bibo gird û tim pê keyfê ma bîyo.
Weş bo şampîyonê zerrîya ma Amedspor.
