ZAZAKÎ NEWS - Hasadê zebeşê Dîyarbekirî, ê ke bi tehm û rengê xo yê xusûsî şinasîyenê, dest pêkerd. Herçiqas germîya pîle ya ke yewca de amey, telebê zebeşî zêde kerdo zî, eynî wext de bîyo sebeb ke pêro berhem yewca de bireso. Na rewşe, fîyat ard war; kîloyê zebeşe nika hêga de 1-2 lîrayan ra yena rotiş.
Zebeşê ke hêgayan ra yenê arêdayîş, bi kamyonan seba marketanê pîlan yê şaristananê sey Îdir, Wan, Edene, Mersîn, Dîlok û Riha yenê şirawitiş.
Weykerdoxanê zebeşanra Ercan Tunç, vano ey 400 donim zebeşî û 100 donim zî qawûnî ronayê, derheqê rewşa nikayêne de derdê xo wina ard ziwan:
"Fîyatê zebeşe nika hêga de mabênê 1-2 lîrayan o. La emser, şertê hewayî, va û firtone zerarêko pîl da zebeşan. Germî, berhemê pêro herêman (Edene, Manîsa, Îzmîr, Xarpêt) yewca de resna. Wexto ke bazar de 100 ton teleb esto, 500 ton mal vejîya. Hal wina yo ke, her kes hewl dano ke malê xo biroşo û no zî fîyatan xo bi xo ano war."
Mîrasê 100 serran
Ercan Tunçî îfade kerd ke zebeşkerîye seba înan karê pî û kalan o, teqrîben 100 serrî yo ke nê karî kenê. O, qîymetê zebeşa Dîyarbekirî bi nê vateyan ard ziwan:
"Na zebeşe, zebeşa Dîyarbekirî ya. Erdê nê cayan, mîneralê ci, no tehm dano ci."
Çime: İHA
