Heyetê dadgehe qirar dayo ke 15 rojnamegerê ke 13 aşmîyo ke hepisxane de yê tehlîye bibê. Semedê 15 rojnamegeran qirarê tehlîyeyî amo dayîş.
Vizêr 15 rojnamegerê Kurdî Dîyarbekir de vejîyayê mehkema vera. Avûkatê Komeleya Heqanê Merdiman (ÎHD), OHDyî zî tede xeylêk avûkatî beşdarê roniştişî bîyî.
Roniştiş de rojnamegeran pawitişê xo da. Rojnamegeran pawitişê xo de pare kerd ke ê semedê xeberanê xo, bi îdîayanê 'şahîdanê nimiteyan' yenê muhakemekerdiş. Rojnamegeran da zanayîş ke ê sûcdarîya 'endamîya rêxistine' qebul nêkenê û teyna rojnamegerîye kenê. Rojnamegeran pare kerd ke îdîaname de xeberê ke înan kerdê sey sûcî ameyê hesibnayîş û derheqê sûcdarîyan de delîlî çin ê.'
Pawitişê rojnamegeran ra dima şahîdanê nimiteyan û akerdeyan qisey kerd. Şahîdê akerdeyî Mehmet Çelîkî îfade kerd ke ey nêdîyo ke nê rojnamegeran sûcêk kerdo. Şahîdê nimiteyî îdîa kerd ke rojnamegerî karanê rêxistinîye kenê.
Şahîda akerde Kezbane Kuday zî îdîayî red kerdî û vat ke produksîyonê PELî karê montaj û bernameyan keno.
Avûkatan îdîayî red kerdî û beratê rojnamegeran waşt. Hetê bînî ra dozgerî zî waşt ke wa rojnamegerî tepişte bimanê.
Pawitişan ra dima mehkeme derheqê pêro rojnamegeran de qirarê veradîyayîşî daye.
Serdar Altan, Azîz Oruç, Mehmet Alî Ertaş, Zeynel Abîdîn Bulut, Omer Çelîk, Mazlûm Dogan Guler, Îbrahîm Koyuncu, Neşe Toprak, Elîfe Ungur, Abdurrahman Oncu, Suat doguhan, Remzîye Temel, Ramazan Geîken, Lezgîn Akdenîz û Mehmet Şahîn bi şertê 'kontrolê edlîyî' vera dîyayî.
