Parlementero verên yê ANAP’î Abdulbakî Erdogmuş îfade kerd ke Abdullah Ocalanî bi nê vengdayîşî wazîfeyê xo ardo ca û va: "Nika zî ganî ê bînî wazîfeyê xo bîyarî ca. Mixatabê nê vengdayîşî îqtîdaro sîyasî yo."
Nuştox-sîyasetmedar Abdulbakî Erdogmuş o ke demêk bibi parlementerê ANAPî, vengdayîşê Abdullah Ocalanî o ke 27ê Sibate de kerdbî, ser o qisey kerd.
Erdogmuşî îfade kerd ke no vengdayîş "tarîxî yo" û destnîşan kerd ke ganî heme hetî berpirsîyarîya averşîyayîşê prosesî bîyarê ca.
Erdogmuşî va: "PKK û grûbê bînî do hesabê xo yê zereyî zî bikerî. Muhîm o yo ke ma nê bîyayîşan bi aqilane analîz bikerî. No semed ra ganî her hetî nerm bê. Zereyê vengdayîşî ra vêşêr, ganî am biewnê encamanê nê vengdayîşî. No şer de gelek merdimê ma merdî, ciwanê ma merdî. Bedelê giranî amey dayîş, hem tirkî hem kurdî bedelê giranî dayî. 2 mîlyon û nêm merdimî koçber bîy. Nêzdîyê 4 hezar dewî amey veşnayîş. Texmînen 17 hezar cinayetê faîlê meçhul amey kerdene."
Erdogmuşî Ajansa Mezopotamya rê qisey kerd, îfade kerd ke berpirsîyarîya her kesî esta û wina va: "Muhîm o ke no vengdayîş bêro ca û têkoşîna çekin bêro vindarnayîş. No semed ra, eke hedîseyê provokatîfê werdi zî bî, ganî bi dîqet bêrê dîyayîş. No karêko dergdem o û berpirsîyarîya her kesî esta. Serekê MHPyî Dewlet Bahçelî zî ganî wazîfeyê xo tem ca bîyaro."
Erdogmuşî îzah kerd ke nika û naye ra tepîya mesuliyet destê îqtîdarî de ya û va: "Mixatabo esasî hukmat o.”
Erdogmuşî aşkera kerd ke hukmat û dewlete waştişê kurdan heta nika nêardê ca û bi bahaneya PKKyî êrişî kerde û va: "PKK seba operasyonanê teberdê sinoranê cayê sey Sûrîye û Îraqî sey bahane amêne xebitnayîş. Nika wedarnayîşê bahaneyêka wînasî kurdan rê destvistişêko gird a."
Erdogmuşî îzah kerd ke ganî bê bazarî heqî bêrê qebulkerdene. ganî bingeyê têkoşînî yo badê vengdayîşî bêro xurtkerdiş. Abdullah Ocalanî bi nê vengdayîşî wazîfeyê xo ardo ca û va: "Nika zî ganî ê bînî wazîfeyê xo ca bîyarî."
