ZAZAKÎ NEWS - Bajarê Amedî de, yew xorto ke seba ke bira û merdimê xo bixelisno xo eşt Royê Dîcle, awe de bi vîndî.
Goreyê agahîyan, dewa Husênikî ya Amedî de, T.A. pîya bi di lajanê xo O.A. û U.A. û yew merdimê xo seba asnawekerdişî şi verê Royê Dîcle.
Wexto ke U.A. û merdimê ey awe de bîy, kewtî rewşêka talûkeye. Seba xelisnayîşê înan, pî T.A. û lajê ey o bîn O.A. zî xo eşt awe.
Bi hetkarîya kesanê derûdorî, U.A. û merdimê ey ameyî xelisnayene, la na rey O.A. awe de bi vîndî.
Xeberdayîşî ser o, ekîbê weşîye, ekîbê xelisnayîşî yê Beledîyaya Bajarê Girdî yê Amedî û cendirmeyî erşawîyayê cayê hediseyî.
Ekîban di kesê ke awe ra ameybî xelisnayene, wedaritî Nêweşxaneyê Dewlete yê Selahaddîn Eyyûbî.
Ekîbê xelisnayîşî seba vînayîşê O.A. dest bi xebatanê cigêrayîşî kerd.
