Enwer Yılmaz

Weçînayîşê Beledîyeyan yê 31ê Adare qedîya û kamcî partî kamca de çend beledîyeyî qezenc kerdî aşkere bîyî.

Weçînayîşo peyên raşta ci başkêş bi û merdim eşkeno ser o zaf çîyan vajo. Ak Partî ke 22 serrîyo ke her weçînayîşî ra bi serkewte vejîyena û bena Partîya yewine, weçînayîşê emserî yê 2024î vînî kerd. CHP bi serran ra dima hewa verêne Tirkîya de bîye Partîya yewine û zaf cayan de mîyaneyê Ak Partî şikit. DEM Partî û Yeniden Refah zî derbê giranî dayê Ak Partî ro.

Partîya Şarî ya Komare (CHP) pê %37.75 pêroyê Tirkîya de bîya Partîya yewine.

Ak Partî ya ke hetanî ewro tim bîyêne partîya yewine bi %35.48 bîya Partîya diyîne.

Yenîden Refah %6.19

DEM Partî %5.7

MHP %4.9

İYİ Parti %3.33

Hüda-Par %0.55

Goreyê nê netîceyan CHP, 14 hebî bajarê girdî, 21 bajarî, 337 qeza û 48 belde dest fînayî.

Ak Partî 12 hebî bajarê girdî, 12 bajarî, 356 qeza û 125 belde dest fînayî.

DEM Partî 3 hebî bajarê girdî, 7 bajarî, 58 qeza û 7 belde dest fînayî. 

Yeniden Refah Partisi, 1 bajarê gird, 1 bajar, 39 qeza, 19 belde qezenc kerd.

MHP, 8 bajar, 122 qeza û 54 belde dest fînayî. 

İYİ Parti, 1 bajar, 24 qeza û 4 dest fînayî. 

Hüdar-Par zî ne yew bajar ne yew qeza ne zî yew belde de nêeşka beledîyeyêk qezenc biko.

Serkewteyê nê weçînayîşî CHP, DEM Partî û Yenîden Refah bî.

CHP cayanê Tirkîya yê pîlan ê sey Îstanbul, Anqara, Îzmîr, Antalya, Bursa, Edene û Mêrsîn de serkewt.

Îdarekaranê DEM Partî her çiqas rojawanê Tirkîya de weçînayoxanê xo ra waşt wa rayanê xo bidê DEM Partî, nêdê partîyêka bîne zî Kurdan rojawan de rayê xo vera AKP dayê CHP û bîyê wesîle ke CHP Tirkîya de biba Partîya yewine û bajaranê girdan de beledîyeyan qezenc bikera.

Raydayoxê DEM Partî bajaranê Kurdan de rayê xo dayê DEM Partî. DEM Partî cayê sey Mûş, Agirî û Dêrsîm de êyê ke weçînayîşê 2019î de vindî kerdbî, newe ra ê bajarê girewtî û serkewtişêko pîl mojna.

DEM Partî sewbîna bajaranê girdan ra Amed, Wan û Mêrdîn zî dest fînayî. Onca Agirî, Batman, Colemerg, Idir, Sêrt zî hetê DEM Partî ra ameyê dest fînayîş. Wan de merkez û pêrûna qezayan de DEM Partî qezenc kerd.

Bajaranê Kurdan de cayê ke destê qeyûman de bî pêro reyna kewtî destê DEM Partî.

Çewlîg de AK Partî Riha zî Yedinden Refah serkewtî. Vîndîkerdişê qeyûman sey destpêkê demê neweyî yeno vînayîş û pawîyeno ke do hukmat êdî nêeşko newe ra qeyûman tayîne beledîyeyanê ke hetê DEM Partî ra amê dest fînayîş bikero.

Amed de DEM Partî Şaredarîya Bajarê Girde û 14 qezayî girewtî. Goreyê netîceya weçînayîşî, Erxenî, Pîran, Gêl, Çinar, Bismil, Farqîn, Licê, Pasûr û Hêne dest fîna. Heme qezaya merkezî Kayapinar, Yenîşehîr, Sur û Rezan de zî namzedê DEM Partî serkewtê.

Mêrdîn de DEM Partî Şaredarîya Bajarê Girde û 6 qezayî girewtî.

Yeniden Refah Afyon,  Darahênî û Riha de beledîyeyî destê AKP ra girewtî.

Qezayanê Çêrmûge, Gêl û Hezro zî AK Partî serkewt.

Suprîzê nê weçînayîşan ra HÜDA-PAR nêeşka yew tek beledîye qezenc biko û no weçînayîş de zî vindî kerd.

Hüda-Par Dêrsim de tena 33 hebî rayî girewtî.

Seba weçînayîşî merdim eşkeno zaf çîyan vajo, mi waşt ez netîceyanê peyênan şima dir pare bikî. La naye zî esta, Tirkîya de her sîyaset gere nika ra tepîya hesabê nasnameyê Kurdan biko. AK Partî bi poltîkaya qeyûman, zindankerdişê sîyasetmedaran û nijadperestan dir îtîfaq kerdiş, peynîya xo ard. Semedo ke CHP vera Kurdan nika nerm a Kurdan şansêk dayo ci. La AKP êdî zor eşkena Kurdan ra paştî bigîra. Belkî zî polîtîkaya xo bibedilno bieşko. Nêzana do se bibo.

Peynî de

Ak Partî vîndî kerd

Îyi Partî vinî kerd

Zafer Partisi vînî kerd

Hüda-Par sey her wextî vinî kerd

HAK-PAR  vînî kerd

Û Qeyûman vînî kerd.

CHP, DEM Partî û Yeniden Refah serkewtî

Nika ma Kurdî gere yewbînî nêdejne û wayîrê yewbînan vejîyê.

Her çiqas partîyê ma cîya bê zî rojanê wînayênen de ganî polîtîkayêka rinde bikê û îradeyêxo tim Sûranê Amedî ser o bialeqne.

Beledîyeyê ke ameyê qezenckerdiş zî gere wayîrê Kultur û ziwanê ma vejîyê, şarî dir eleqedar bibê û partîyanê bînan ê Kurdan dir û pêrûna dezgeyanê sîvîlan û meslekîyan dir eleqedar bê, paştî bidî înan. Û medya Kurdî ra wayîr vejîyê. Medya Kurdî mîyanê bêîmkanîye de kena ke bi ziwanê Kurdî weşan biko.

Wa netîceyê weçînayîşî şarê ma rê xêrîn bê. Ez hêvî kena ma rojanê hîna weşan vînenê û BENA HOL!