ZAZAKÎ NEWS - Hukmatê Brîtanya eşkera kerd ke ê plan kenê ke serra raydayîşê seba weçînayîşanê pêroyîyan biancê 16 serrîye. Na game sey yew bedelîyayîşêko tarîxî yena vînayîş û bi naye Brîtanya do bibo yewê ê welatanê ke tede serra raydayîşî tewr kemî ya.
Na game hetê Partîya Karkeran a ke îqtîdar de ya ra amey eştiş. Labelê rexnegirî na rewşe sey gamêka seba menfeetanê partîye vînenê, çunke ciwanê ke ê serre de yê, hîna zaf meyl danê partîyanê çepan.
Serekwezîrê Brîtanya Keir Starmerî derheqê mesela de wina va:
“Ez bawer kena ke zaf muhîm o ke ciwanê 16 û 17 serrî wayîrê heqê reydayîşî bê. Çunke ê eşkenê bixebitîyê û vergî bidê, coka ê tewrê sîstemî benê.”
Starmerî da zanayîş ke eke yew kes tewrê sîstemî beno, ganî heqê ey estbo ke vajo pereyê ey senî yeno xerc kerdiş.
Seba ke no bedelîyayîş bêro caardiş, ganî hukmat yew qanûn pêşkêşê parlamentoyî bikero. Dinya de tena çend welatî sey Awusturya, Arjantîn û Brezîlya îzn danê ke kesê 16 serrî weçînayîşan de ray bidê.
