Bilhuda Doğan Çit
Qezaya Çewlîgî Darahênî de awanîyê nêsexlemî û vengî nênê rijnayîş û tehlûke vila kenê dordorê xo.
Zelzeleyê 6ê Sibate ya 2023î ra pey zaf şarsitananê herême de hezaran awanîyî xisaro giran dîy, seyan awanîyî ameyî rijnayîş û hema hezaran awanîyî estî ke gano do bêrê rijnayîş.
Heto bîn ra awanîyê verênî û kanî û nêsexlemî zî ganî bêrê rijnayîş û semedê înan qerarê rijnayîşî esto.
Darahênî de zî semtê Afatlaran de desan bînayê verênî estê û ganî bêrê rijnayîş. Nê bînayî emser ameyî vengkerdiş. La serrîyo ke gere bêrê vengkerdiş.
Semedo ke nêameyî vengkerdiş kesê ke esrar ancenê yan reqî şimenê zî ê binayê vengkerdeyî xo rê kerdê cayê tîrkayî.
Semedo ke berdoşî uca de tîryak oncenê şaro ke dorûverê ê bînayan de yo zî aciz o û wazeno wa çareyêk bêro vînayîş.
Ma nêeşkenê verê înan ra vîyarê
Welatî Mehmûd Özgür o ke bînaya kişta ê bînayanê vengkerdeyan de nişeno ro vano ke, “Serrîyo ke nê bînayî ameyê vengkerdiş. Ma tersenê verê înan ra vîyare. Berdoşî yenê tîya de esrar ancenê, reqî şimenê. Peynî de zî tîya de qi û mîza xo kenê. Xora merdim boya pîse ra nêeşkeno tîya ra vîyaro. Ma çend rey polîsan ra va, bênê tîya kontrol bikêne, meverdêne wa tîya de kes reqî bişimo la nêameyî. Kesê ke tîya de reqî şimenê mîyanê şewe de danê pêro, qîrenê. Tutê ma tersenê.”
Mehmûdî îzah kerd ke, bînayî xora sexlem nîyê, beno ke bêrê war û derdorê înan de şerîdê asayîşî çin o û waşt wa înan rê çareyêk bêro vînayîş.
Kes eleqedar nêbeno
Namzetê DEM Partî Îdrîs Elhakanî zî hêrsê xo vera nê bînaynê xirbeyan de mojna û va, “ Wîna bedilnayîşê bajarî (Kenntsel dönüşüm) nêbeno. Darahênî de her gure pê rant û dizdî bena. Nê bînayî bîyê cayê serxoşan. Ma çend rey Qeymeqamî ra zî va la eleqedar nêbîyê.”
Zazakî News / Darahênî
Bingöl
