ZAZAKÎ NEWS - Dêrsim de 10 hezar û 557 mayînî estê û ê mayînê ke hema zî nêameyê pakkerdiş, bîyê sebebê mergî û no talûke cuyê şarî tehdîd keno. Semedo ke mayînî û madeyê teqayoxî yê cengî nênê wedaritiş, şar mîyanê terse de yo.
Mayînî, tena Dêrsim de ney, wîlayetanê sey Agirî, Erdexan, Batman, Çewlîg, Bedlîs, Amed, Dîlok, Colemêrg, Hatay, Îdir, Qers, Mêrdîn, Sêrt, Riha, Şirnex û Wan de zaf ê.
Mîlyonêk mayîn, bi hezaran qurbanî
Goreyê cigêrayîşan, Tirkîya de 839 hezar mayînê anti-personelî, 164 hezar û 797 mayînê anti-tankî, pêro pîya 1 mîlyon û 101 hezar û 389 mayînî estê. Goreyê çimeyanê herêmîyan, 10 hezarî ra zêde mexdûrê mayînan estê. Dêrsim, bi 10 hezar û 557 mayînan, na lîste de sere de yo.
Peynîbîyayîşê prosesê pêrodayîşî û destpêkerdişê yew prosesê neweyî yê çareserîye, welatîyan rê bîyo hêvî. Welatîyî fîkîrîyenê ke eke dewlete mayînanê herême wedaro, ê do tay rehet bê.
La, talûke her roje verê çiman de yo. Mesela, Dêrsim merkez de, dewa Sütlücede, mayînê ke nezdiyê qereqolê verênî de ronîyayê û nêameyê pakkerdiş, hem seba dewijan, hem seba heywankaran, hem zî seba ziyaretkeran talûkeyêko pîl ê mergî virazenê.
Xebere Ali Haydar Gözlü
Çime: Rûdaw
