Kitabê şîîran yê Doğan Munzurogluyî bi nameyê “Koyî Bîyê Xezal” çap bîyo.

Dogan Munzuroglu o ke şîîrê ey hetê deyîrbazanê zonê ma ra zî zaf reyî ameyê wendiş, nika şîîrê xo sey kitab çap kerdî.  

Kitabê şîîran yê Dogan Munzurogluyî hetê weşanxaneyê “Dara” ra weşanîyayo. Kitab 104 rîpel o û tede 17 hebî şîîrî estî.  

Koordînatorê Pêroyî yê kitabî Bawer Barew o, edîtorê ey Mutlu Can o, dîzaynê qepaxî zî Sadık Hangül viraşto.

Hunermendo Dêrsimij Mikaîl Aslan o ke şîîranê Dogan Munzurogluyî ra deyrî viraştbî, derheqê vejyayîşê kitabî de hesabê xo yê X’î ser ra parekerdişêk kerd û va,

Xebera de wese: Çi waxto ma no kitab pîtêne.  Şîîrê Doğan Munzuroğlu reştî wendoxonê kirmanckî/zazakî.  Namê kitabî mi bixo na pira;"Koyî biyê xezal" Wes û war bo  @darayayinlari ebi pêşta sima royê ma onca sa beno.

Mikaîl Aslanî Vervateyê kitabî zî bi xo nuşto û cayêkê ci de seba şîîranê Doğan Munzurogluyî wîna vano;

Bingehê şîîranê Doxanî otantik o, ziwanê xo nazik û nerm o, sey Ahmet Arîfî yo. Çekuyanê xo zerrî ra vano, derg nêkeno, mordemî nêqefilneno. Teyr û Tûrî, dar û kemerî, nanê pepûgî, gizerî hînî weş tevsîr keno ke, mordem a linga xo wertê xozayî de vîneno. Vengê çemî êno gosanê to, suzga vayî dana rîyê to ro, boya zembûlî êna pirnikanê to.     

Doğan Munzuroglu

Doğan Munzuroğlu serra 19613i de Dêrsim de maya xo ra bîyo. Bi nameyê Dersim Aleviligi, Ten için Hayıflamalar û Alişer hîrê hebî kitabê hetanî nika vejîyayê. Bi nameyê “Tertele” belgefîlmêk zî anto. Xeylê nuşteyê ey bi Zazakî û Tirkî zaf cayan de ameyê weşanayîş. No kitabê ey verên o ke bi zonê ma de vejîyayo.

Hunermend Cemîl Qoçgîrîyî serra 2016î de bi şîîranê ke hetê Dogan Munzurogluyî ra ameybî nuştiş, albumê bi nameyê “Zalâla” vetibî.  

Xebere / Zazakî News