Kedkarê ziwanê kurdî, kedkarê dewaya Kurdistanî Mehmûd Yoruk (Mehmûd Nêşîte) par roja 09.11.2022î Dîyarbekir de rîyê nêweşîyêka xo ra wefat kerdbi.
Welatperwero Kurd, endamê Grûba Xebate ya Vateyî Mehmûd Nêşite, serrgêra wefatê xo ya yewine de Dîyarbekir de hetê dost û heskerdoxanê xo ra yeno yadkerdiş.
Programê yadkerdişî do hetê Komeleya Kultur, Perwerde û Hetkarîye ya Farqînî ra bêro organîzekerdiş û do roja Panşemeyî ( 09.11.2023) saete 11.00 de Camîya Goristanê Yenîkoyî de bêro ca.
Nameyê Komeleya Farqînî Mehmet Çelîker ser o dawetîyeyî ameyî hadrekerdiş û tede wîna ame vatiş: "Semedê serrgêra wefatê Mamosta Mehmûd Nêşiteyî ma do bi dost, heval û heskerdoxanê ey dir yadkerdişêk kenê. Kerem bikêne ma pîya silamêk bide Mamosteyî."
Mehmûd Nêşite kam o?
Mehmud Nêşite 1945 de dewa Xosorî, qezaya Licê, bajarê Dîyarbekirî de ameyo dinya. 1963 de bîyo mamoste. Hîris serrî tay bajaranê Tirkîya û Kurdîstanî de mamostayîye kerde. 1994 de teqawut bi. Serra 1980 de surgun bi, dima reyna Dîyarbekir de ciwîya. Bi zazakî hîkaye, kitab û meqaleyan nuşt û endamê Grûba Xebate ya Vateyî bi. Mehmud Nêşite 2022 de Dîyarbekir de dinyaya xo bedilna.
Mehmûd Nêşite yew nuşteyê xo wîna behsê muhîmîya ziwanê dayîke keno.
Şitê dayîkanê ma kurdan, xorînîya tarîxê mîletê ma ra yeno! Tede tehmê welatê ma tehmê kulturê ma tehmê ziwanê ma esto. Şitê dayîkanê ma kurdan de rence esta, zehmetî esta! Şitê dayîkanê ma de amênê mewcudîyetê mîletê ma, amênê mewcudîyetê însanetîya ma esto! Şitê dayîkanê ma de şan, şeref û namusê mîletê ma esto! Şitê dayîkanê ma de amênê ziwanê ma esto…
