Teşkîlatê Heqanê Merdiman ê Sûrîye (SOHR), bîlançoya hedîseyanê şîdetî ya ke bajarê Siwêda de eşkera kerd. Goreyê SOHRÎ hûmara kesanê ke herême de pêrodayîşan de merdê, sivîlî zî di mîyan de, resa 594 kesan.
Goreyê raporê SOHRî yo ke merkeze ci Londra de yo û tarîxê 17ê Temmuza 2025î de vila bîyo, mîyanê qurbanan de 300 Durzî estê. Ame îdîakerdiş ke nê Durzîyan ra 154 kesî sivîl ê û 83 kesê bînî zî hetê hêzanê pabesteyanê Wezaretîyanê Pawitişî û Karanê Zereyî yê Sûrîye ra "bêmehkeme ameyî înfazkerdiş".
Pêrodayîşan de 257 personelê hukmatî û 18 mîlîtanê Bedewîyan merdê. Rapor de vajîya ke 3 endamê eşîra Bedewîyan zî "hetê mîlîtananê Durzîyan ra bêmehkeme ameyî înfazkerdiş".
Teşkîlatî da zanayîş ke teberê nê vîndîkerdişan de, hêrişanê hewayî yê Îsraîlî de 15 personelê bînî yê hukmatî merdê û yew rojnamegero ke pêrodayîşî teqîb kerdêne, o zî wefat kerdo.
Pêrodayîşî senî dest pêkerdî?
Temîyanbîyayîşê herême, bi pêrodayîşanê ke mabênê eşîranê Bedewîyan ê herêmîyan û mîlîtananê Durzîyan de dest pêkerd. Îdareyê Şamî, bi behaneya "newe ra awankerdişê aramîye " eskerî şawitî herême. Labelê, grûbê Durzîyan û şahidê hediseyî, hêzê hukmatî bi ey sûcdar kerdî ke ê hetê Bedewîyan de vera înan şer kenê.
Krîz, bi kewtişê Îsraîlî zî pîl bi. Îsraîlî, bi behaneya "pawitişê Durzîyan", hêrişê mewzîyanê artêşa Sûrîye kerd û têmîyanbîyayîş hîna zêdîya.
