ZAZAKÎ NEWS - Dêrsim de cenazeya xortê vîndîbîyeyî, erebaya ke kewtbî gola barajî, tede ame vînayîş
Dêrsim de, cenazeya xortê 26 serreyî yo ke şewa verêne ra nata vîndî bi, erebaya ke perraya Gola Barajî ya Uzunçayirî, mîyanê aye de ame vînayîş. Ganxelasan, cenazeya gencî ereba ra vete, derheqê hedîseyî de zî cigêrayîş dîya destpêkerdiş.
Goreyê agahîyan, Ekin Bulato 26 serre, şewa verêne saete 02:00 de taxa Aktulukî (Türüşmek) de wexto ke erebaya pîyê xo rê mazot girewtêne, tewr peyên uca de ame vînayîş. Semedo ke demêko derg ci ra xeber nêame girewtiş, keyeyê ey muracatê vîndîbîyayîşî kerd.
Xebatanê cigêrayîşî de, yew îxbar ser o yetkîlîyan rayîrê Dêrsim-Xarpêtî ser o, herêma Pirdê Mazgêrdî de, Gola Barajî ya Uzunçayirî de yew ereba tesbît kerde. Nê tesbîtî ser o, ekîbê jandarmerî, AFAD, UMKE, 112, îtfaîye û MUDAKî herême rê ameyî şirawitiş.
Xebata ke ganxelasan gola barajî de kerde, netîce de cenazeya gencî ereba ra amey vetiş.
Cenazeya gencî, seba ke otopsîya ci bêro kerdene, amê berdene morgê Nêweşxaneyê Dewlete yê Dêrsimî. Derheqê hedîseyî de hetê serdozgerîya komare ra cigêrayîş ame destpêkerdene.
