ZAZAKÎ NEWS -Dêrsim ke bi tebîet û kulturê xo yê xusûsî şinasîyeno, her goşeyê xo de rindekîyêka cîyaye esta. Nê cayanê efsûnînan ra yew zî Wareyê Merge yo ke Koyanê Munzurî ser o yo. Nê rojanê amnanî de, hewa her ca de germ o, Wareyê Merge û dormeyê ey de merdim eşkeno çar mewsiman pîya bicuyo.
Herçiqas mewsimo amnan o û germîye hakîm a, Koyê Munzur hema zî binê vewre de sipî yê. Cayanê corênan de vewre, kinaranê koyan de hezar rengî vilikî, û dereyan de zî xuşxışa awe pîya yew panoramaya bêhempa virazenê. Herêma Wareyê Merge û Gola Şîn ke 2 hezar û 500 metreyan berz a, dîmenê payîz, zimistan, wisar û amnanî pîya asenê.
Koywan û geştkerî, seba ke nê asayîşanê rindekan bivînê, yew rayîro çetin danê verê xo û xo resnenê nê herêman. Koywan Adnan Donmez, o ke rindekîya Dêrsimî ra heyran mendo, wina vano:
"Ez teqrîben di serrî yo ke fealîyetanê koywanîye kena. Ma vejyenê koyanê Pilûrî û Pîlemurîye. Cayanê ke ma zîyaret kenîme, tede cayê rindekî estê."
Geştkerî, rayraşîyayîşê xo de tenya tebîet nê, heyatê koyî zî nezdi ra vînenê û şahîdîya heywananê sey pezkovîyan kenê.
"Merdim nêwazeno peyser ageyro"
Geştker Tansel Şahînogluyî zî tecrubeyê xo yê Zozanê Merge wina ano ziwan:
"Ma ewro seba ke şirîme Zozanê Mergî şîme pay. Dima ke ma bi erebaya xo saetêk û nîme ameyîme, ma erebaya xo vindarna û kewtîme payan ra. Herçiqas tecrubeyê mi yo rayraşîyayîşî zaf çinî yo û embazan va rayîro çetin o zî, merdim nêwazeno peyser ageyro. Rayraşîyayîşê 4 saetan ra dima, ma resayîme golî."
Dêrsim, bi tebîetê xo yo ke dest nêresayo ci û bi heyatê xo yê koyî, şaristanêko xusûsî yo. Şarê ci yo tebîetpawitox zî na xeznaya erjaye sey çimanê xo paweno. Her serre bi des hezaran geştkerî, seba ke nê rindekîyan bivînê, rîyê xo danê Dêrsimî.
