Xeza de 111 kesî veyşanîye ra merdî

ZAZAKÎ NEWS - Wezaretîya Weşîye ya Xezayî eşkera kerd ke Xeza de en kemî 111 kesî veyşanîye ra merdê.
Çend hewteyo ke Îsraîl îzn nêdano qet yew hetkarîye bireso Xeza. Wezaretîya Weşîye ya Xeza hişyarî da ke Xeza de “veyşanîyêka kiştox” ameya meydan û hûmarê mergî yê sebebê veyşanîye ra zî zêdîyenê.

Wezaretîye îfade kerd ke 24 saetanê peyênan de 10 kesî veyşanîye ra merdê û hûmara pêroyî ya merdeyan resa 111 kesan, ke înan ra 76 kesî gede yê.

Nêweşxaneyî bêçare yê

Teberê kemîbîyayîşê werd û hewcedarîyanê rojî ra, zafanîya nêweşxaneyanê Xeza sebebê kemîbîyayîşê derman û malzemeyanê tibî û bombekerdişanê dewamkerdeyan ê Îsraîlî ra vindertê. Goreyê Wezaretîya Weşîye ya Xeza, 38 nêweşxaneyan ra, tena 16 nêweşxaneyî kar kenê. Na rewşe de, sebebê bombekerdişanê dewamkerdeyan û veyşanî ra, nêweşxaneyî nêeşkenê xizmet bidê.

Goreyê Wezaretîya Weşîye ya Xeza, wexto ke şer dest pêkerdo, a roje ra hetanî nika Xeza de 59 hezar û 106 kesî ameyê kiştiş û 142 hezar û 511 kesî zî birîndar bîyê.