Badê ke karê reydayîşî saete 21:00ê wextê herêmî de qedîya, %89ê sindîqî ameyî akerdiş û reyî ameyî hûmaritiş. Goreyê netîceyanê verênan ê nêresmîyan ê ke hetê Associated Pressî (AP) ra ameyî eşkerakerdiş, namzedê Demokratan Zohran Mamdanî %50,4ê reyan girewt û reqîbê xo yo tewr nêzdî namzedo xoser Andrew Cuomo rê teqrîben 9 pûanî ferq eşt. Cuomoyî %41,6 reyî girewtî, namzedê Partîya Komare Curtis Sliwayî zî %7,2 de mend.
Mamdanîyo 34 serre, bi nê netîceyî unvanê "Serekê Şaredarîya Bajarê New Yorkî yo Verên o Misilman" girewt.
Serekê ABD Donald Trumpî, namzedê Demokratan Zohran Mamdanî sey "komunîst" name kerdbi û tehdît kerdbi ke eke weçînayîşî qezenc bikero, do fonanê federalan ê bajarê New Yorkî "bibirno".
Mamdani kamo?
Mamdanî, paytextê Ugandayî Kampala de, keyeyêkê bi eslê xo Hindîstanijî de ameyo dinya û hewt serrîya xo de keyeyê xo reyde bar kerdo şîyo New York.
Lîseya Zanistî ya Bronxî wendo û dima Unîversîteya Bowdoinî de warê Cigêrayîşanê Afrîka de lîsansê xo temam kerdo. Tîya de, organîzasyonê kampusa grûba bi nameyê "Wendekarî seba Edaletê Fîlîstînî" dayo dest pêkerdene.
Mamdanî, yo ke namzedê serekîya şaredarîye yo verên o Misilman û Başûrê Asya ra yo, kampanyaya xo de kulturê xo yê cîya-cîyayan da ver. Yew vîdeoyê xo ke bi ziwanê Urduyî weşanaybî, perçeyê klîbanê fîlmanê Bollywoodî estbîyî. Yewna vîdeoyê de zî bi Îspanyolkî qisey kerd.
Cinîya Mamdanî, Rama Duwajiya 27 serre ya û eslê xo Sûrîya ra ya û hunerkar ya. Dadîya ey Mîra Naîr derhênerêka fîlman a namdare ya û babîyê ey Profesor Mahmood Mamdanî zî Unîversîteya Columbîa de dersan dano. Hem dadîya ey hem zî babîyê ey mezunê Unîversîteya Harvardî yê.