ZAZAKÎ NEWS - Fuarê Otomotiv û Mobîlîte ke hetê hemkarîya Mezopotamya Fuarcılık û Atlantik Fuarcılıkî ra virazîyeno, 13 serran ra dima do Dîyarbekir de sektöre otomotivî bîyaro yew ca. Tayê sektorê otomotivî ê girdi do fuar rengîn bikerê.
Dîyarbekir, mabênê tarixanê 21-25 Gulane de do sektorê otomotivîbiko mêman. Fuarê Otomotiv û Mobîlîte ke bi hemkarîya Mezopotamya Fuarcılık û Atlantik Fuarcılıkî virazîyeno, do Merkezê Fuar û Kongre yê Mezopotamya de bêro viraştene.
Akerdişê fuarî do 21ê Gulane, roja Çarşeme, saete 12:00 de bêro kerdene. Na xebata ke do panc rojan ramojno, her roje saete 11:00 de dest pêkena û şane saete 20:00 de qedîyena.
92 markayî û 55 şîrketî beşdar benê
Ardimkarê Serekê Heyetê Îdarî yê Odaya Tîcaret û Sanayî ya Dîyarbekirî (DTSO) Erdal Avşar, derheqê detayanê fuarî de îzahat da. Avşarî, va ke fuaro ke 13 serran ra dima ancîya virazîyeno, do 92 markayî û 55 şîrketî û temsilkarîyanê înan ca bigîrê.
Dewanê sektorî Dîyarbekirî de yenê têhet
Fuar, tenya şîrketanê ke wasitayan virazenê nê, şîrketanê yan sanayî, saziyanê malî û şîrketanê ke seba sektorî xizmet danê zî do biyaro yew ca. Na fuar ke do tede teknolojîyê peyênî û çareserîyê sektorê otomotivî bêrê têhet, hedefê xo o yo ke zîyaretkaranê xo rê dîyayişêko hîra bimojno.
Erdal Avşarî va, "No fuar, hem do averşîyayîşê mintiqa rê ardim bikero hem zî do Dîyarbekirî biyaro merkezê teknolojîyanê otomotivî.
Fuar, tenya ramojnayîşanê wasitayan û teknolojî nê, eynî wext de beşdarîya namanê ke warê xo de yê naskerde reyde zî do balê şarî ancêro.
YouTuber û înfluencero ke nameyê ci Doğan Kabak o, programsazê televîzyonî Saffet Üçüncü, Hakan Girginer, Pelin Erbil, Turgut Yüksekdağ û Serekê Komeleya Wasitayanê Elektrîkî ya Tirkîya Berkan Bayram, do fuarî de beşdarê sohbetan û panelan bibê.
