Amed de dezgehê cematê sivîlî, keyeyê Rojin Kabaişe û hemwelatîyî seba waştişê edaletî Meydanê Berê Koyî ra heta Camîya Pîle rayîr ra şîyî; ame waştiş ke mergê Rojine bi heme hetan ra bêro roşnîkerdiş.
Seba persanê bêcawab ê tehqîqatê mergê wendekara Zanîngeha Yüzüncü Yılî ya Wanî Rojin Kabaişe, Dîyarbekir de bi sernameyê “Ma seba Rojin Kabaişe rayîr şonê” çalakîya rayîrşîyayîşî ameye kerdene. Waya Gülistan Doku zî tewrê çalakîye bîye. Kome Meydanê Berê Koyî ra dest bi rayîrşîyayîşî kerd û verê Camîya Pîle de bi eşkerayîya çapemenîye çalakîye qedênaye.
Maya Rojine: Waştişê ma tenya edalet o
Çalakîya ke tede sloganê seba edaletê Rojine ameyî vatene de maya Rojine Aygül Kabaişe qisey kerd û va: “Rojine şîye, hewna newe ra nêna labelê kam sûcdar o wa cezaya xo bigîro. Ma di serrî yo ke zaf dej ancenê. Bêrê qisey bikê, sûcê xo îtîraf bikê. Waştişê ma tenya no yo ke edalet bireso cayê xo.”
Waya Gülistan Doku zî qisey kerd
Waya Gülistan Doku Aygül Doku zî waştişê xo yê edaletî ard ziwan û va: “Qatilî wa bizanê ke dosyaya Rojin û Gülistana bêra roşnîkerdene.”
Verê Camosûrî de eşkerayîya hempare ya hetê Merkezê Heqanê Cinîyan ê Baroya Wanî û Baroya Dîyarbekirî ameye hadrekerdene, hetê ezaya Merkezê Heqanê Cinîyan ê Baroya Dîyarbekirî Helin Tapanciye ra ameye wendene.
