ZAZAKÎ NEWS - Heyetê Îmralî yê DEM Partî, ke vizêr bi Rayberê PKKyî Abdullah Ocalanî reyde pêvînayîş kerdbi, ewro saete 15:00 de do bi Serekkomarê Tirkîya Recep Tayyîp Erdoganî reyde bêro têhet. No pêvînayîş, do pêvînayîşo diyîn bo.
Eşkerayîya nuştekîye ya DEM Partî de ame vatiş ke Ocalanî îfade kerdo ke proses kewto yew qonaxêko newe. Eşkerayîye de nê vatişê Ocalanî ca girewtî:
"Ocalanî ard ziwan ke, bi gamanê ke do bêrê eştene, warê caardişê hewcedarîyanê prosesî de mesulîyet keweno milê her kesî, milê ma pêroyînan ser. Ey destnîşan kerd ke o girîngîyêka pîle dano pêvînayîşo ke endamê Heyetê ma do bi birêz Serekkomarî reyde virazê û no pêvînayîş sey yew pêvînayîşêko tarîxî name kerd. Unca zî da zanayîş ke komîsyono ke do Parlamentoya Tirkîya (TBMM) de bêro awankerdiş, do warê aştî û çareserîye de rolêko pîl kay biko."
Prosesê aşitî
Proses, serra vîyarte bi vengdayîşê Serekê MHPyî Devlet Bahçelîyî dest pêkerdbi. Ocalanî zî 27ê Sibate de bi yew nameyo tarîxî venga PKKyî kerdbi ke çeken rono û xo fesh bikero. PKK, ke 40 serran ra zêde yo fealîyetanê çekdarîyan keno, 12ê Gulane de qerarê çekverdayîşî û xo feshkerdişî girewt.
Çimî Silêmanî ser o yê
Pawîyeno ke PKK no hefte çeken rono û na rewşe bi yew kombîyayîşê çapemenîye eşkere bikero. Ame vatiş ke prosesê çekverdayîşî, yo ke sey "nîşaneyê nîyetê weşî" yeno namekerdiş, do şaristanê Silêmanî yê Herêma Kurdîstanî de virazîyo.
Goreyê agahîyan, DEM Partî do bi yew heyetî tewrê kombîyayîşî bo û xeylê rojnamegerê Tirkîya ra zî do zaf kesî eqîb bikerê.
