ZAZAKÎ NEWS - Minareya Çarlinge ya ke Mîyanê Sûrî ya Dîyarbekirî de ya 504 serrrî verê cû ameya viraştiş. Xususîyetê na minare no yo ke çar estunan ser ameya awankerdiş.
Demo peyên de zaf gêrayoxê ke yenê Dîyarbekir xobixo edetêko newe îcad kerdo.
Gêrayoxî dorûverê minare de 7 hewe gêrenê û bin o qayde bawer kenê ke waştişê înan yan zî çîyo ke xeyal kenê yeno ca.
Şarê Dîyarbekirî na bawerî ra hayîdar nîyo û bi matmende ewnîyeno kesê ke dorûverê minare ra gêrenê.
Mehmud Ateş o ke Dîyarbekir de mîyanê Sûrî de mehleya Xançepekî de amo dinya û uca bîyo pîl Zazakî Newsî rê wîna vano: “ Hetanî ewro mi wîna yew çî ne dî ne ez pêhesîyaya. Kesê ke teber ra yenê înan no îcad vet. Xora nika keyeyê ma tîya de çîn ê. Demê xendekan de keyeyê ma şîyayê we. Nika ma ge-ge yene mehleya xo ya verêne. La ma raştê edetanê neweyan yenê. Verî dormeleyê na minare de çîyêko wîna çîn bi. Milet xobixo çîyan vejena.”
Enwer Yilmaz
