ZAZAKÎ NEWS - Amed de dima şayîya pîrozkerdişê Newrozî, polîsan eşt keyeyê tayê kesan ser ê ke beşdarê Newrozî bibîy. Netîceyê serdegirewtişan de, 2yê înan cinî pêro pîya 18 kesî, ke verê cû ameybî dest bendkerdene, vejîyayê mehkeme û bi îddîaya “propagandaya rêxistine kerdene” ameyî tewqîfkeridiş.
Emnîyet de persê polîsan
Wexto ke emnîyet de tehqîqat ame kerdene û îfadeyê şikdaran ameyî girewtene, polîsan nê persê ke bala merdimî ancenê, înan ra pers kerdî:
“Gelo şima bi emrê rêxistine tewrê Newrozî bîyî?”
“Şima senî Newrozî ra agahdar bîyî?”
“Şima qey şalê kesk, sûr û zerdî piştî xo ra?”
Ancî ame musayîş ke wextê îfadeyî de, derheqê fotografanê endamanê PKKyî yê ke meydan de ameybî aleqnayîş de zî persî ameyê perskerdiş.
Dima ke pêro muameleyî qedîyayî, Mehkeme bi îddîaya “propagandaya rêxistine ameya kerdene” qerarê tepiştişî seba 18 kesan da û ê pêro şawitî hepisxane.
