Enwer Yılmaz
Ewro rojêka tarîxî bî. Grûbêka gerîlayan a PKKyî, vengdayîşê Serekê PKKyî Abdullah Ocalanî ser o, sûka Silêmanî ya Herêma Kurdîstanî de eşkefta Casenê de bi merasîmêk çekê xo veraday.
Endama Konseyê Rayberdişî ya KCK'yî Besê Hozat merasim de qiseykerdişêko zaf muhîm kerd û a bi xo zî çeke xo na ro.
Mîyanê grûbe de, Endama Konseyê Rayberdişî ya KCK'yî Besê Hozat, Nedîm Seven, Têkoşîn Ozan û Tekîn Mûşî pîya bi 15 cinîyan û 15 camêrdan, pêro pîya 30 gerîlayî estbî.
Merasîmê çekveradayîşî yo ke PKKyî viraşt, bêguman seba çareserkerdişê Persa Kurdan û demokratîkbîyayîşê Tirkiya yew gamêka muhîm a. Na gama ke bi vengdayîşê Abdullah Ocalanî ameye eştiş, tena yew gama leşkerî nîya; eynî wext de yew mesajo sîyasî yo. No mesaj hêvîyan pîl keno la persanê neweyan zî xo dima ano.
Verî, ganî ma biewnîyê manaya na game ra. Merasîmê çekveradayîşî nîşan dano ke PKK bi hawayêko fermî îlan kerd ke ê wazenê micaleyê çekdarî ra vîyarê micadeleyê sîyasî yo demokratîkî. No yew îfadeyê îradeyî yo. Vengdayîşê Besê Hozate seba "sererastkerdişê qanûnî" zî nîşan dano ke na game bêşert nîya; yew bingeyo huqûqî û sîyasî wazena. Hozat bin o qayde wazîfe dana dewleta Tirkiya û hukmatî.
Hetêk ra zî na rewşe, seba ke proses mîyanneteweyî bibo û meşrûîyetê xo xurt bikero, zaf krîtîk a.
Astengî û persê ke verê ma de yê
Labelê, rayîrê aştîye dayîm bi vilan nêno xemilnayene. Verê nê prosesî de astengîyê pîlî estê:
1. Bêbawerî: Herbo ke 40 serran ra zêde dewam kerdo, mabênê hetan de bêbawerîyêka xorîne viraşta. Awankerdişê bawerîye, do wextêko derg û hewldayîşêko pîl biwazo.
2. Îradeyo sîyasî: Gelo hukmatê Tirkiya seba ke gamanê heqîqî yê demokratîkan bierzo û waştişanê Kurdan bîyaro ca, wayîrê îradeyêko qewîn o? Na mesele hema roşn nîya.
3. Bingeyo qanûnî: Gama çekveradayîşî heta ke bi yew çarçewaya qanûnî nêro ronayîş û garantî nêro dayîş zehmet o.
Peynîye de, ma eşkenî vaje ke gama çekveradayîşî ya PKKyî yew berê hêvîye kerdo a. Na game, potansîyelêk awan kerdo ke eşkeno şer û şîdet biqedîno û seba çareserîyêka sîyasî rayîrêko newe abikero. La, serkewtişê nê prosesî tena girêdayîyê yew hetî nîyo. Gerek hem hetê Kurdan, hem hukmatê Tirkiya, hem zî aktorê herêmîyan bi hawayêko cesûr û aqilane têbigêrê.
Gama ke ameya eştiş, pîl û tarîxî ya. Labelê, seba ke na game bibo aştîyêka mende, ganî bi gamanê edalet, seypeyî û demokrasî bêro tacîdarkerdiş. Heto ke tewr muhîm o, no yo ke êdî mesela bi qiseykerdiş bêro çareserkerdiş, bi çekan ney.
