ZAZAKÎ NEWS - Wezîrê Edaletî yê Tirkiya Yilmaz Tunçî, derheqê çekveradayîşê gerîlayanê PKK'yî de qisey kerd û va ke, ewro rojêka tarîxî ya û ard ziwan ke ewro ra tepîya hema zaf karî estê ke ganî bêrê kerdene.
Vizêr, Eşkefta Casenê ya ke sinoranê qezaya Dukanî ya wîlayetê Silêmanîye de ya, yew koma gerîlayan a PKK'yî, sey "nîşanê nîyetpakîye" seba serkewtişê prosesê çareserîye çekê xo vêşnaybî.
Wezîrê Edaletî Yilmaz Tunçî, derheqê çekveradayîşê 30 gerîlayan ê PKK'yî de yo ke Başûrê Kurdîstanî de ame viraştene de, qisey kerd.
Tunçî îzah kerd ke ewro seba Tirkiya rojêka tarîxî ya û îfade kerd ke bi paştîdayîşê heme qismanê cimatî û partîyanê sîyasîyan proses do bi serkewtî netîce bigîro.
Yilmaz Tunçî wina va:
"Ewro ra tepîya, bi taybetî, hema zaf karê ma esto ke ma bike.
No proses do bêro teqîbkerdiş. Sazîyê dewlete yê eleqedarî bi hesasîyetî prosesê çekveradayîşî ser o xebitîyenê.
Na qonaxe de her kes dî; wexto ke mabênê sazîyanê dewlete de yew koordînasyon virazîyeno û wexto ke muxalefet vera averşîyayîşanê weşan helwêstêko weş nîşan dano, welatê ma de senî karê serkewteyî yenê kerdiş.
Parlamento de do yew komîsyon bêro awankerdiş. No komîsyon do hetkarîyêka rinde bikero.
No komîsyon de, heme partîyê sîyasîyî do bieşkê fikr û ramananê xo yê derheqê prosesî de bîyarê ziwan.
