SERMEST
Mi no rîpelêk romanê James Joyce’î Ulîsesî ra gîrewt. Tîya de yew profesero îrlandayij qalê zîwanê îngîlîzkî keno, eslê xo de kare ci zî musnayîşê îngîlîzkî yo. La no profesor bi zordarî îngîlîzkî museno, îngîlîzkî ra ne bawerîya ci est a ne zî hurmetê ci. Zîwanê metînî (sey heme metînê joyce’î) binê zehmet o, xo zor dano famkerdiş la profesor û hevalê ci vanê ke şarê Îrlanda îngîlîzkî bi zordarî musayî û çekuya îngîlîzkî dinyaya îrlandayijan de çîyêk îfade nêkena. Ne derdê înan rê bena derman, ne hîsê înan eşkena tercume bîkera û ne zî çîyêk. Coka ê vanê hetane ke ma îngîlîz û îngîlîzkîyê serkewte ra teslîm benê medenîyetêko bîyo vîndî şîyo ma o medenîyet ra û a dewaya bêhevî ra sadiq manenê. Tabîî naye zî ez vaja şarê îrlanda, wexto ke no metîn ame nuştiş (1900-1910) her tim vîndî kerdêne û Îrlanda giredayeyê Îngîlîstan bî la nîka Îrlanda bîya azad, ez a Îrlanda rê silam kena û dore dana Joyce’î.
Dewayêka Bêhevîye/ULÎSES
Ma hertim dewayanê bêhevîyan rê sadiq mendî, va Profesor. Goreyê ma muwafaqîyet, hem kiştoxê îdraqî yo hem zî yê muhayelî yo. Çirey sadaqatê ma qezenckerdoxan rê, serkewteyan rê nêbî. Bele ma înan rê xîzmet kenê, ez bi xo zîwanê înan ê bêruh û bêmanayî musnena. La ez zanena ke a netewîya ke ez ziwanê înan musnena , eke zîhnîyetê înan serdest bibo, ê tena qîymet danî madîyatî. Zîhnîyetê înan yanî bi kilmî tehaqumê madîyatî. Goreyê înan wext zî pere yo. Homayê mi! Spîrîtualîzm rê se bî? Hazretî Îsa ho ça de yo? Lord Salîsbury? Na dînya de hendê yew kanepe cayê înan çîn o. La yunanî wîna yî?
Mîyanê verçimikê xo yê sîyayî de çimê ci beriqîyayêne, ey lewê xo yê dergî bineyna derg kerdî.
–Yunanî! Va newe ra. Kyrîos! Na çekuye beriqîyena. Neteweyê samî û saksonî nê vengan nêzanenê. Kyrîe! Roştîya zîhnî. Werrekna mi yunankî bimusnayne, ziwanê îdraqî. Kyrîe elesîon! Ê wa şêrî tuwalet virazî wa çala laximî bidî viraştiş, hedê înan nîyo ke ê efendîyê ruhê ma bibo. Ê împaratorê sprîtuelê ke Atîna de bi fîloyanê xo bîyê vindî şîyê ma rayîrê înan ser a şinê. Ê bîyî vindî. Pyrros yew kehanet ver a xapîya û seba ke qederê Yunanîstanî bibedîlno teşebuso peyên kerd. O zî dewayêka bêhevîye rê sadîq bî.
–Qet şerî ra nêremayî, va Mr. O’Madden Burke bi vengêkê xizî la tim vindî kerd.
