ZAZAKÎ NEWS - Berîvan Aymaz a ke bi eslê xo Çewlîg, Dara Hênî ra ya û Almanya de sîyaset kena, semedê serektîya beledîyaya Almanya namzedîya xo eşkera kerde. Aymaza ke veng da ciwananê Kurdan ke wa tewrê sîyasetî bibê va ke, ez bi vîzyonê "Köln bikerî paytextê ekolojî yê Ewropa" kewta rayîr.
Berîvan Aymaza ke Partîya Keskan a Almanya de Hetkara Sereka Parlamentoyê Eyaletê Kuzey Ren-Vestfalya ya, namzedîya xo ya Serektîya Beledîyaya Kölnî eşkera kerde. Berîvan Aymaz yew kênaya yew keyeyê Çewlîgijî ke koçê Almanya kerdo ya.
Aymaz, roportajo ke dayo Rûdawî de, da zanayîş ke serektîya beledîye ya ke babîyê aye serra 1977î de kerda, helwestê aye yê polîtîkî ser o rolêko bewlîkerdox kay kerdo û va ke, ez na namzedîye hem seba karîyerê xo hem zî seba dîyasporaya Kurdan a Almanya sey yew noqtayê muhîmî vînena.
Aymaz, bal ante serê awanîya zaf-kulturî ya Kölnî, çalakîya Newrozî ya ke tede zêdeyê 60 hezar kesan ca girewto, sey mojnayoxê na dewlemendîye nîşan da. Aymaz îfade kerd ke, eke a bêra weçînitene, do polîtîkayanê kulturî û sosyalan bida dewamkerdene ke her keso ke nasname û kokê cîyayan ra yeno, xo Kölnîde sey keyeyê xo de hîs bikero û va, "Ez hedef kena ke Köln bikerî yew bajarê 'ma'yî."
Nasnameyo kulturî û polîtîkayê paştîdayoxî
Berîvan Aymaz, da zanayene ke ganî nasnameyê kulturî bêrê pawitene û paştî bêrê dayene û va ke ganî musnayîşê Kurdkî û çalakîyê kulturî yê cîyayî hetê beledîyayan ra bi hawayêko hîna bitesîr bêrê paştîdayene.
Derheqê Berîvan Aymaz û keyeyê aye de
Berîvan Aymaz, serra 1972yan de qezaya Çewlîgî, Dara Hênî de ameya dinya û serra 1978î ra nata Almanya de ciwîyena. Babîyê aye Saît Aymaz, ke meslegê ey o esasî mamostatî bi, serra 1973 de CHPyî ra sey Serekê Beledîyaya Çewlîgî ame weçînitene û hetanî 1977î no wezîfe kerd. Dima ra, serra 1978î de sey Ataşeyê Perwerdeyî erşawîya Almanya. Saît Aymaz, ke emser wefat kerd, dima ke derbeya leşkerî ya 12ê Îlone bi, wezîfeyê xo ra ame girewtene û agêrayîşê Tirkiya qebul nêkerd û bi cinî û tutnaê xo reyde qerar da ke Almanya de bimano.
