Ewro Dîyarbekir de programo ke hetê TURSABî ra ame organîzekerdiş de wayîrê acenteyanê herême ameyî yewca.
Temsîlkarê acenteyanê turîzmî Mîyanê Sûrî de Koşka Gazî de ameyî têhet û ewilî pîya arayî kerd.
Temsîlkarê acenteyanê turzmî, derheqê senî do hîna zêde turîstî bêrê herême, xizmetêko senî do bêro dayîş û herême de averberdişê turîzmî de mişewre kerd.
Serekê Heyete Temsîlî yê Herêma Mezopotamya (BTK) yê TURSABî Serdar Baturayî Zazakî News rê qisey kerd û da zanayîş ke, demanê pandemî û erdlerzî de Dîyarbekir hetê turîzmî ra tepîya mendbi û wîna va; “Raşta ci erdlerzî ra tepîya turîstî bibî kêmî. La nika newe-newe leqayîş esto. Mintiqaya ma hetê tarîxî û kulturî ra mintiqayêka dewlemend a û cayê turîzmî ya. Eke ma bieşkê daşinasnayîşê ci weş bike her hetê Tirkîya û dinya ra turîstî do biherikiyê tîya”
Serdar Baturayî îzah kerd ke, înan nê kombîyayîşî de problemê herême yê turzîmî ser o mişewre kerdo û acenteyê ke tîya de falîyet kenê, semedo ke wa herême de turîzm aver şêro ser o fikrê xo û pêşnîyazê xo îfade kerdê.
Xebere: Zazakî News
