ZAZAKÎ NEWS - Serekkomar Tayyîp Erdoganî, Kampa Îstîşare ya 32. ya AK Partiyî ya ke qezaya Anqara Kizilcahamamî de virazîyena de qisey kerd. Erdoganî va, Meclîs de do yew komîsyon bêro awankerdiş. Ma do hewcedarîyanê qanûnîyan ê prosesî binê banê Meclîsî de munaqeşe bikere.
Erdoganî çalakîyê çekdarî yê PKK'yî ardî vîr û va: "A roje ra hetanî nika xeylê hukmatî ameyî. Her yewê înan va, ê do terorî biqedînê. Labelê teror, ne welatê ma de, ne zî erdanê welatanê bînan de nêqedîya. Elbet naye de sebebê tayê caardişanê şaşîyan ê dewlete zî estbî. Torosê Sipî nînan ra yew bî. Cînayetê faîl-meçhulan nînan ra yew bî. Zîndanê Amedî nînan ra yew bi. Dewê ke ameyî veşnayîş, merdimê ke şewêke de bi zorî ameyî koçberden, mayê ke nêeşkayêne zîndan de bi gedeyanê xo bi Kurdkî qisey bikerê, nê caardişê şaşî bî. Usulê tekoşînî yê ke teberê huqûq û meşrûîyetî de bî, cayê ke terorî biqedînê, eksê ey teror hîna xurt kerd, pîl kerd; zemînêko musaît ê îstîsmarî da terorî. Ma pîya bedelê nê şaşîyan da."
Erdoganî da zanayîş ke prosesê pêrodayîşî texmînen 2 trîlyon dolaran zirar dayo ekonomî û îşaret bi bira çekveradayîşî ya PKK'yî kerd. Erdoganî va: "Vizêr zî, rêxistine bira xo ya ke girewtbî ard ca û bi merasîmêk çekî veradayî. Bêbextîya terorî ya 47 serran, vizêr ra tepîya, înşallah kewte prosesê qedîyayîşî. Ewro, ma vîr ra nêkere, rojêka newî ya. Ewro, tarîx de yew pelo newe abîyo. Ewro, berê Tirkiyaya pîle, Tirkiyaya bihêze, seserra Tirkiya hetanî peynîye abîyê."
Erdoganî va: "Eke Tirk-Kurd-Ereb pîya bê, o wext Tirk, Kurd, Ereb estê. Wexto ke yewbînan ra dûrî bikewê, vîndîkerdiş esto.
Erdoganî peynî de nê çîyî vatî: "Nika ma do ronişe û qisey bike... Çekan ney. Ma do rî bi rî, zerrî bi zerrî qisey bikere. Ma do hewcedarîyanê qanûnîyan ê prosesî binê banê Meclîsî de munaqeşe bikerîm.
