ZAZAKÎ NEWS - Rojnamegero namdar Fatîh Altayli ke vizêr bi sûcdarîya “Tehdîtkerdişê Serekkomarî” amebi destbendkerdiş, ewro bi qerarê mehkeme tewqîf bi û şirawitîya hepisxane.
Altaylı, vizêr keyeyê xo yê taxa Şîşlî ya Îstanbulî de hetê polîsan ra amebi destbendkerdiş.
Serekdozgerîya Îstanbulî derheqê destbendkerdişê Altayli de eşkerayîyêke daye û wina va:
“Semedê vatişanê ey ê tehdîtî yê vera Serekkomarê ma Recep Tayyîp Erdoganî ke 20ê Hezîrana 2025î de kerdbî, derheqê Fatîh Altayli de bi sûcdarîya tehdîtkerdişê Serekkomarî tehqîqat ameyo destpêkerdiş. No şexs, goreyê talîmatan ewro ameyo destbendkerdiş.”
Hêzanê asayîşî, Altayli berd Mehkemeya Îstanbulî. Mehkeme, bi sûcdarîya “Sûcê Tehdîtkerdişê Serekkomarî” ra qerarê tepiştişê Altayli da û ey şirawit hepisxane.
Fatîh Altayli, nika nuşteyanê xo keyepelê xo yê bi nameyê "fatihaltayli.com.tr" weşanneno û kanalê xo yê YouTubeî ser o zî derheqê rojeve de programî viraştêne.
