ZAZAKÎ NEWS - Serekê Pêroyî yê Partîya Saadetî Mahmut Arikanî, Kongreya Asayî yo 8ine ya Amedî de qisey kerd û bi hawayêko eşkere veng da dewlete ke wa cayê mezelanê Şêx Seîd, Seîd Nûrsî û Seyîd Rizayî aşkere bikera û va: "Ganî dewlete peynîya nê şermî bîyaro."
"Ma nêeşkenê bi famo ke mezelan ra terseno, proseso newe awan bikerîme"
Mahmut Arikanî qiseykerdişê xo de va, “Ganî dejê ke ma seserra yewine de antê, bêrê vînayene, ma nê dejan bi yew famê neweyî mebere seserra diyîne” û wina dewam kerd:
“Ewro zî Tirkîya de cayê mezelanê Şêx Seîd, Seîd Nûrsî û Seyîd Rizayî nêzanîyeno. Ez naca ra eşkere û zelal vana, ma nêeşkenê bi yew famo ke mezelan ra terseno, prosesêko newe awan bikere. Ez tîya ra vengdayîşêko eşkere kena; ganî dewlete nê şermî biqedîno û cayê mezelanê Şêx Seîd, Seîd Nûrsî û Seyîd Rizayî lezabez aşkere bikero.
No tarîx, tarîxê ma yo. Bi talî û şîrînîya xo, vîrê ma yo pêroyî (muşterek) yo. Ganî seserra diyîne ya Komare, tekrarê eynî xeletîyan nêbo. Ganî seserra newîye bingeyê tersî ser o ney, bingeyê hêvîye ser o bêro awankerdene. Ganî qet yew kes semedê nasnameyê xo yê neteweyî, mezhebê xo, bawerîya xo yan zî fikrê xo ra mecbûr nêmano ke bedelan bido.”
