ZAZAKÎ NEWS - Welatîyê ke dewanê qezaya Rihayî Sêwregi de cuyenê, vera biryayîşê elektrîkî yo ke 3 rojî yo dewam keno, protesto kerd. Şaro ke çalakîya verê DEDAŞî de netîceyêk nêgirewt, bi traktor û kamyonanê xo rayîrê Amed-Sêwregi girewt.
Bi seyan welatîyî verê Mudîrîya DEDAŞî ya Qeza de ameyî pêser û vera biryayîşî hêrsê xo mojna.
Wexto ke waştişê welatîyan ê pêvînayîşê bi Mudîrê DEDAŞî hetê mudîrî ra ame redkerdiş, welatîyan verî rayraşîyayîşêk viraşt, dima ra zî rayîrê Sêwregi-Amedî trafîkî rê girewt û dest bi çalakîya roniştişî kerd.
Welatîyanê ke bi kamyon û traktoran rayîr girewt, va, "Problemê elektrîk û awe yo ke serranê dergan ra nata nêno çareserkerdiş, êndî bîyo sey yew birîne ".
