Nuştox, rojnameger û xebatkarê ziwanê kurdî/kirdkî Seyîdxan Kurij 2013 `de hîrê kitabî weşanaybî. Înan ra di kitabî telîf, yew zî açarnayîşî bi. Nisan 2014 de yewna kitabî Seyîdxan bi nameyî „Deyîrî Çewlîgî“ ame neşirkerdiş.
Kitabî Deyîranî Çewlîg İstanbul`de weşanxaneyî Nas çap kerd. No kîtab de deyîrî sîyasî, egîdê û lorîyî, govend, xêrîbîye û deyirrî zêr yan zi deyirî koyan pêro pîya 112 deyirî estî. Heme deyirî dormareyî Çewlîg û Pali ye. Xercî deyîran kîtab de fekî Çewlîgî sero yew nuşte û cuyê taye dengbêjan sero malumat zî esto. Kitab pêro pîya 207 ripelo.
Seyîdxan Kurijî sey endamê Gruba Xebate ya Vateyî nêzdîyê vîst serran a kirdkî rê xebat keno. Heto bîn ra na xebata xo ya grubî wareyê rojnamegerîye de tetbîq keno. Her ware ser o nuşteyan nuseno.
Nuştoxî kîtabî “Deyîrî Çewlîgî” Seyîdxan Kurij derheqî na xebatê xo de kîtab de wina nuseno, “ Sey zafê qicanî Kurdîstanî mi zî qijkekê xo de bizyewanê (şivanê bizyeyan) kerd. Ma bizyeyan ver de, serî koyan de tim û tim deyirî vatêni. Ma bizyeyan ver de hêna zaf deyirî egîdan, deyirî xerîbê yan zi deyirî zêr vatêni. Her deyirê egîdê yew hîkayeya xo esta. Wexto ke ez bi xo dew de bîya zi, taye hedîseyî bîy, merdimî ameyî kiştiş. Xortanî dewê ma ca de nê hedîseyan ser o deyirî vetêni. Ma zî zaf lez nê deyirî ezber kerdên û vatêni.
Ez hama zaf qic bîya ez şîyeni vêveyan. Verî mi pîlî xo, xortî dew temaşe kerdêni. Cuwa pey mi destî înan girewtêni, dora peyênen de, mi zî bi înana pîya govend girewtêni. O wext vêveyan yew hefte ramitêni. Hetî ma de (Çolîg, Depi, Pali) saz û hacetî muzîkî yê bîn çîn bîy. Nika zi dewan de saz û hacetî muzîk yê bîn çîn î. Ma vêveyî bi def û zurna viraştêni, yan zî ma bi xo deyirî vatêni û govend girewtêni. No rid ra hetî ma di deyirî govend zaf ê. Heta bi deyiranî egîdan zi govend gerîyena. Zafê deyiranî egîdan bi “şûno şûno” dest ci kenî û bi nê deyiranî “şûno şûno” govend gerîyena. Ez zafê nê deyiran qijkekê xo de vêveyan de musaya. Yanî ez zafê nê deyiran ezbere zana. La hanc zî mi zafê nê deyiran dew de yan zî Almanya de dayî xortanî Kurijan vatiş.
Ez 1990 ra nat ha nê deyiran top kena. Hema hema piyerê deyiran kasetan di bîy. Mi studyoyî radyoyê ma di “ Radyoya Dengê Kurdan li Duîsburgê” ne deyirî dîgîtalîze kerdî.
Kitabî mino verên (Wayê Hot Birayûn) 2002 de Îstanbul di Weşanên Arya çap kerdi. No kitabî de 23 deyîrî (lawikî) estî. Hanci çend deyirî mi zî kîtabî Mehmet Bayrak ”Kürt Muziĝî, danslari ve şarkilari- Muzikî kurdî, reqs û deyirî” de ameyî çap kerdiş. No kîtab hîrye cîltî yo.
La no kîtab mi tenê deyirî yî, pîyerê deyiran ke mi arêkerdî îta di ca genî.
Kunyeyî Kitabî:
Deyirî Çewlîgî
Arêkerdox: Seyîdxan KURİJ
Editor: Mehmet Gul
Nas Ajans Yayınları
