Fatma Yılmaz
Yewitîya Zerrîdayoxê Kurdkî (DILKURD) semedê Dersa Kurdkî ya weçînitî hetêk ra dezgeyanê sîvîlan zîyaret kenê hetêk ra zî mîyanê şarî de vilawekonê agahdarîyan vila kenê.
Koordînatorê DILKURDî Fevzî Bulganî hesanê xo yê X'î ser ra aşkere kerd ke, înan ewro Weqfê Mezopotamyayî zîyaret kerdo û Serekê Weqfê Mezopotamyayî Osman Akyil, Sekreterê Pêroyî Îhsan Ay, û Koordînatorê Akademî Mikail Bilbil dir ameyê têhet û derheqê Dersa Weçînitî ya ya Kurdkî de mişewre kerdo.
Mîyanê Heyeta DILKURDî de Koordînatorê DILKURDî Fevzî Bulgan, Canan Yıldırım û M. Saît Ozturk estbî.
Heyeta DILKURDî badê zî Odaya Bazirganî û Sanayî ya Dîyarbekirî (DTSO) zîyaret kerd.
Heyeta DILKURDî ke mîyan de Serekê Şubeyê Dîyarbekirî Mehmet Saît Ozturk zî estbi Serekê DTSOyî Mehmet Kayayî dir yew pêvînayîş kerd.
Cadeyan de vilawekî vila kerdî
Heyeta DILKURDÎ û endamê Weqfê Rêya Azadî badê zî çend semtanê Dîyarbekirî de vilawekê ke bi Zazakî û Kurmanckî ameybî nuştiş vila kerdî.
Şarê Dîyarbekirî ra ame waştiş ke wa semedê tutanê xo ê ke şinê sinifanê panc, şeş, hewt û heşt dersa Kurdkî biweçînê.
Zazakî News
