Şaxa Egîtîm Senî ya Rihayî Musebaqaya Hîkayeyan a Yewin a Huseyîn Denîzî virazena.
Emser Musebaqaya Hîkayeyan a Huseyîn Denîzî ya yewine virazîyena û kesê ke wazenê tede ca bigêrê eşkenê berhemanê xo bi Zazakî (Dimilkî) Kurmanckî û Tirkî bierşawê musebaqa.
Sekreterê Şaxa Egîtîm Sen a Rihayî Sînan Halatî da zanayîş ke reya verêne na musebaqa tertîp kenê û va "Her kes eşkeno berhemanê xo bierşawo. Semedo ke wa Kurdkî aver şêra ma xebatan kenê. Semedo ke wa Kurdkî biba ziwanê resmî ma micadele kenê.”
Jurîyê beşa Kurmanckî Ozlem Ateş, Ronya Bewran, Haşîm Yetîm, Mehmet Yildiz û Hadî Altûndag ê. Juriyê beşa Zazakî zî Ronya Bewran, Sefer Bakçî, Şahîn Kukçu û Kafûr Seçîlmek ê. Kesê beşdarê musebaqa benê ganî pa malumatanê xo yê şexsî berhemanê xo sey metnêkî [email protected] rê bierşawê. Musebaqa de semedê kesanê yewin, diyîn û hîrêyînan do xelata pereyan bêra dayene.
Netîceyê musebaqa do 15ê Gulane Roja Roşanê Kurdkî de bêro aşkere kerdene.
Huseyîn Denîz muxabîr û nuştoxê Ozgur Gundemî bi û 9ê Tebaxa 1992î de Serêkaniya Rihayî de amebi kiştene. Huseyîn Denîz wexto ke Riha de ziwan û folklorê Kurdkî ser o xebitîyêne kişîyabi. Eğitim Sen a Rihayî emser semedê yadkerdişê ey reya verêne Musebaqaya Hîkayeyan tertîp kena.
