Huner

Kitabê Yaşar Balukenî: Mewlana ra hîkayeyî

04.07.2025 - 11:45

ZAZAKÎ NEWS - Kitabê elektronîk (e-kitab), "Mewlana ra Hîkayeyî", keyepelê (website) www.kirdki.com ser o ameyo weşanayene. Kitab, ke hetê nuştox û açarnayox Yaşar Balukenî ra ameyo amadekerdene, hîkayeyanê felsefîyan ê Mewlana Celaleddînê Rûmî bi yew ziwanêko zelal ano verê wendoxanê Zazakî.

Bi averşîyayîşê teknolojî, edebîyato dîjîtal zî roj bi roje beno hîra. Xebatê weşanayîşê e-kitaban, ke xeylêk ziwanan de demêko derg o estê, nika ziwanê ma de zî cayê xo hîna kenê pêt. "Mewlana ra Hîkayeyî" zî no war de bîyo yew nimûneyo newe.

Açarnayoxê kitabî Yaşar Baluken derheqê na xebata xo de vano:

“Hetanî 7 serrî verî, wendegeh de, mi bi wendekaranê xo dir saeta wendişî de kitabî wendêne. A roje mi kitabê xo, xo vîr ra kerdbi û nêardbi wendegeh. Ayra ez ewnîya kitabanê wendekaran ra ke yew weçînî û biwanî. Wina hem ez do bibîyêne nimûne, hem zî mi do wextê xo bi wendiş vîyarnêne. Kitabanê ke mi girewtbî, înan ra kitabê ‘Mewlana Ra Hîkayeyî’ vet û dest bi wendişî kerd. Wexto ke mi çend rîpelî wendî, kitab zaf weşê mi şî. Mi xo bi xo va, ‘De ez biewnî, gelo ez eşkena nê cumleyan biaçarna Zazakî?’ A hele mi hîna ke ceribna, mi dî ke destê mi ra yeno û mi xo bi xo va, ‘Qey ti nê kitabî nêaçarnenê Zazakî?’

Mi o kitab girewt û berd keye. Keye de ser o xebitîyaya. Tabî, o wext nuştişê mi hema sey ewroyî aver nêşîbî; xeylêk xetayê mi vejîyênê. Mi goreyê fekê Çewlîgî açarnayêne û dima ra çeku bi çeku Ferhengê Vateyî ra qayît bîyêne. Mi çend hîkayeyî açarnayî. La ez xo ra zaf bawer nêbîya. O wext mi va ez hew seba redaktekerdişî şaîro erjaye Merdimînî ra persa. Mi ci rê telefon kerd. Ey zî bi zerrîweşî qebul kerd û va, ‘Yew rey de nêbeno, ma pîra-pîra ser o bixebitîme, hîna baş beno.’

Na xebate 7 serrî verî dest pêkerdbî. Nêzdîyê şeş aşman kişta, la nê şeş aşman de her roje nêxebitîyayêne. Wexto ke mi dest bi açarnayîşî kerd, mi verî ra va ke ez na xebate sey kitabêko elektronîk weşanena. Yew, ez xo ra bawer nêbîya ke kitabî çap bikera. Di, ez komputerî ra zaf eleqedar a û karanê komputerî ra hes kena. E-kitabî dîyayêne û no fikir uca ra vejîya. Raşt o, dima ke xebate qedîyaye, tayê embazanê mi vat, ‘Bierşawe weşanxaneyanê ma, wa çap bikerê.’ Mi di hebî rê şirawit. Înan va, ‘Eke to ziwanê orîjînalî ra açarnayêne, ma do weşanayêne, la to Tirkî ra açarnayo, coka ma rê nêbeno.’ Ez zî newe ra ageyraya qerarê xo yê verênî ser. Mi no kitab goreyê rastnuştişê Vateyî nuşt, la mi va wa hîna ke boya fekê Çewlîgî zî ci ra bêro.

Ez bi xo zî hîkayeyan nusena, la goreyê mi hema wextê çapkerdişî nêamey. Ganî hema demê xo bivîndê. La hêdî-hêdî wazena ke koywanîye (dağcılık) ser o kitabêk binusa. Eke Homa biaro ca.”

Mîyanê Kitabî ra tayê hîkayeyî

Kitab de hîkayeyê Mewlana yê namdarî bi Zazakî ca gênê. Tayê înan nê yê:

Nêweşê Eşqî

To Zî Şuşeyî Deverdayî

Emşo Hindîstan De

Nefs, Sey Şêro Xidarî Yo

Rindîyê Papaxanî û Ziwanî Ey Belayî Sereyê Ey O

Çol De Yew Bedewîyo Feqîr û Cinîyê Eyi

Alimê Ziwanî(Ziwanzan) û Kelekvan(Qeyîkçî

Qazvînij û Deqker

Seyad(Seydwan) Bi Xo Beno Seyd

Kerr Şino Qey Nêweşî