Seyîdxan Kurij - Bonn
13.06.2026`de bajarê Bonn- Almanya de DÎAKURD û Civaka Kurd li Almanya pîya bi ameyê „ Dîyasporaya Kurd – Hêzê Transneteweyî û Perspektîvê ameyoxî“ yew konferansa Akademîk viraṣt. Tîya de pers, wezîfe, rol û muhîmîye dîaspora sero teblîxê akadamîk ameyê peṣkeṣ kerden.
Tîya yew babetanê zaf cîya cîya de kombîyayiṣî ame organîze kerden, zaf kesanê sîyasetmedar, zanyar, aktîvîst, îdarekarê komelanê sosyal, kulturî, olîê dîyaspora qisey kerd. Înan ra yew zî serekê Konfederasyona Revenda Kurdistanî Ṣîfa Barzanî bi.
Konferans bi qiseykerdişê hetkarê serekî Civaka Kurd li Almanya Mehmet Tanriverdî abî, dima serekê Diakurd Adnan Axacan, Şîfa Barzanî, Şêx Murşid Xaznevî, serekê Civaka Kurd li Almanya Ali Ertan Toprak, Parlementara Eyaleta Bremen Ṣahxanim Görgü – Phillip, temsîlkarê HAKS Hakar Mîrza, Serekê Navenda Neteweyî yê Rojhilatê Kurdîstan Ali Mazoudji û temsîlkarê Dîakurd Keya Izol qisey kerd.
Ṣîfa Barzanî, ma sey Konfederasyona Revenda Kurdistanî û Baregehê Barzanî xebatanê winayin destek kenî, va û qiseykerdiṣê xo wina ramna, „seba Barzanî Kurdîstan tena Kurdîstana Baṣûr nêbi, ey her wext Kurdîstan tena sey welat dîyo, qet no parçebîyayiṣo de fakto qebûl nekerd. Kurdîstan yew o, no ridra zî ganî xebatê Dîaspora yew bo. Ewropa de 4 mîlyon ra zaf kurd estê û eke no hêz bîbo yew, şêno Ewropa de bîbo "hêzêko nerm" (soft power) yo zaf bibandor. Ganî hetê sîyasî yê Kurdistanî vîlabîyayişî, yew bîn de rikerdiṣî ra fek verdaê û diasporaya kurdan bikerê yew. Ganî kurd partîtîye ra dûr vinderê û seba kurdîstana, xeta kurdayetî sero kar bikeri“.
Qiseykerdoxê bîn rolê dîaspora sero vindertê û waṣt ke kurd dîaspora de pîya bixebitî, rexistinanê sîvîl, yê ke giredayê partîyan nêyê, otonom ê saz bikerê, rêxistinanê meslekî ronê û xebatanê xo de menfaatê netewa kurd bigerê çimano xo vero.
Nê qîseykerdiṣan ra pey bi sernameyê „Doza Kurd de rola Dîasporaya Kurd“ yew panel virazîyay. Tîya de bin moderatîya Prof. Dr. Çînur Ghaderî de Prof. Dr. Hamit Bozarslan, Prof. Dr. Bahar Baṣer û Prof. Yaşar Abdulselamoğlu qiseykerd.
Heme qiseykerdoxan behsê tarîx û rolê dîasporaya Hindîstanî, Cihûyan, Armenîyan û Arnawutan kerd. Hemeyan ard ziwan ke nika 4 mîlyon kurd dîyasporaya de ciwîyenê. Eke enerjî û keda înan, bi otonom bêro rêxistin kerden û kurdayetî esas bêro girewten, kurd sîyasetê dinya de, ekonomî, îlm û teknîk de benê hêzêko giran û eṣkenê bandorê dewletan bikerê.
Na panela pey beyntarê beṣdaran de sohbet virazîya beṣdaran peṣnîyarê xo peṣkeṣ kerdê.
Tîya de zaf kesan ard ziwan ke ê miletî ke wahar dewlet nê yê, yanî bêdewlet ê, înan de rolê dîyaspora zaf muhîm a. Sey mîsal zî dîyasporaya cihûyan û armenîyan amê dayen.
