Arêkerdox: Mistefa Gomayij
Cay beno cay nêbeno yew lajek beno. Lajek nîyet keno von ez siba ra şorî bajar. Beno siba warden tengonî xo şedeynen û raywan beno şonu. Zaf toy şonu raştî yew xeyde yeno eke xeyde adir grewto ha veşena! Xo pîze de von ‘gereka ez ine adir hewnaka’. Bineykî şonu nizdî eke çi şoru; tern û wuşk têdir veşeno. Kil kelibîyaya û pêlî dona. Çim çimî nêveyneno. Lajek Îtya pereno ûca pereno tesela ey kuwena la nişêno adîr hewnako.
Ayo teşqelede yew çêzî û nalî yena goştî ey. Seke yew tira vajo hela bewnî xora core. Lajek serey xo berze keno ek çi veyno: Mîyanî terrom da adîr de eke yew mar ha tîtîkdî yew qabaxêra lêfî dono xo çêzeno. Xwi pêze de von ’ez rinde zono marî bêbextî la wijdonî mi dest nêdo ez caverdo şorî. Cayra yew rewta derg gêno û beno nizdîyê qabaxêr von ‘mala ez marî adır ra dûrî fîno.’Ne yew ne di. Mêratî marî xo şuşe keno û pereno rawt. Heta lajek nefes don gêno mar rasterast xo erzeno poldî lajek û vono: -Ez dona tode!
Lajek marî ra von:
-Ero bêbext biney norever mi ti adir ra nêxelisnay? Ti wariştî fêlî kenî.
Mar vono:
-No gure min o. Ti mi adir ra bixelisnî nêxelisnî ez dona tode; gureyê mi pededayiş o. Lajek lebên nêlebên la mar polî lajekî verenêdon. Jongal donu qesbada ey. Leşa ey bena giran û çimî ey zî benî lêl! Lajek ewnên xînt û xiraba.
Agêren marî ra von:
-De bê yew bexte bide mi, ma îtya ra heta ayo lewe şorî în cîn kome kewte ma vera wa marî şerîete bikero. Şerîetî Homay çi va serey çimondî mi ser.
Mar baxerî keno von:
-Temom. Zaf toy şonî raştî yew luye yenî.
Luye vona:
-No çi halî şima wo eylekêney?
Lajek agêren luye ra vono:
-Ez raywan bîyo şînî suke. La ez raştî yew xeyde umew eke adir grewta ha veşena. Raşta qale mi va mala ez ine adîrî hewnako. La ez şîyo nizdî eke çi şoru, tern û wuşk têdir veşeno! Kil kelibîyaya û pêlî dona çim çimî nêveyneno. Ez Îtya peraw ûca peraw tesela mi kewte ez nişîyawo adîr hewnako.
Ayo şawat de yew çêzî û nalî umey goştî mi. Seke yew mira vajo hela bewnê xora cor. Mi serey xo berze kerd ez çi veyno: Mîyanî terrom da adîr de eke yew mar ha tîtîk dî yew qabaxêraw lêfî dono xo çêzeno. Ez rinde zono mar bêbexto la ahile wijdonî mi dest nêda ez caverdo şorî. Cayra yew rewta derg kewte mi dest û mi berde nizdîyê qabaxêr la mêratî marî xo şuşe kerde erze rawte heta mi nefes da grewt rasterast ume erze poldî mi va: -Ez dona tode!
Mi tira va:
-Ero bêbext biney norever mi ti adir ra nêxelisnay? Ti wariştî fêlî kenî. La bêbextî zêlîya xo mira têşonay va: -Pededayiş karî min O
Ez agêraw mi mar ra va:
-De bê yew şans bide mi; ma îtya ra heta ayo lewe şorî în cîn kome kewte ma vera wa marî şerîete bikero. Şerîetî Homay çi va serey çimondî mi ser.
Marî va:
-Şerîetî Homay çi va se ez zî qebul keno. Ma raştî to umey waklu.
Luye vona:
- La Şerîet karî dapîrda to yo. Ewnêna lajek ra ewêna marî ra vona şerîet inehawa nêbeno.
Agêrena mar ra vona:
-Ti şî binegoştî lajek de serey xo ronaw û zêlîya xo firfirnenî ayo mêrik tersra nişêno îfade î xo bido.
Mar von:
-La ma sekî?
Luye mar ra vona:
-Ti bê kişta min a raşt û wa lajek zî bêro kişta min a çepe ez zî şima rî şerîetî bikero. Mi komîr qerar da gereka şima qebul bikerî. Mar îqna beno û yeno kişta luye de cayê xo de lêfî dono û paweno. Lajek zî çuwa dest de kişta bîn de cayê xo gêno.
Luye ewnêna lajek ra vona:
-Ayo çîyo ha to deste de.
Lajek vono:
-Daro
Luye heyna ewnêna lajek ra pirnika xo derge kena kişta raşte ser vona:
-La ayo çîyo erde lêfî dayo.
Lajek vono: -Maro
Luye vona:
-Ey lêxin lêxin bêbexto û bêîtîbaro! Lajek çiqas ke tira yena çuwa dono sereydî marî ro, mar ûca miren .
Mi ra zurî Homay ra raştî.
Vatox: Zilfî Nebo
