Resul Yıldırım
Ez bi "Çi heyf û hezar heyf"î dest pêkena.
Çi heyf û hezar heyf...
Werrekna eyro ma dinya de û welatê xo de zulman, kiştişan, qetlan, zorbeyîyan, şerran û qirkerdişan ra qisey nêkerdênê. Çi heyf û hezar heyf ke ma kenê û wina asîyeno ke do ma biker zî.
Wexto ke ma yew sîteya xeberan û ajansan ra ewnîyenê yan zî ma goşê xo danî qisêyanê çarşî û bazaran ma vînenê ke mîyanê xeberan de kiştişî îlla est ê. Êdî ma ro normal yeno kiştişê însanan û ma zaf bale nêdanê ci. Heta ma nêwazenê qisey biker enê kiştişan ser o. Yew kîşt ra zî psîkolojîyê merdimî zî êdî hewanênano. Çi heyf û hezar heyf...
Eslê xo de ez nêwazena serê enê kiştişan de qisey bikerî. Her sîte û ajans de xo ra bi hezaran xeberî est ê. Ez wazena ser ê sîte û ajansan de "kiştişê cinîyan ser o bikarardişê ziwanî" de qisey bikerî û tayê zî rexne bikerî.
Heme dinya de însanî sey yew bomba dekerde û seba teqayîş amade yî. Sebebê enê zaf î û pisporê enê gureyî xo gore îzah kenî. Meseleya ma ena nîya. Meseleya ma ziwano ke kiştişê cinîyan de bikar yeno yo.
Enê xeberan de ziwan zafane wina yo; reyna yew cinî bî qurbanê carmêdan, carmêdan yewna cinî kişte, carmêdan emserr hende cinîyî kiştî, yew carmêdî cinîya xo kişt... Goreyê enê cumleyan ra seke Carmêd neyarê Cinîyan o û bi ena neyarîya xo cinî û cinîyan kişeno. Labelê wina nîyo û her carmêd yan lajê yew cinî yo, yan mêrdeyê aye yo, yan birayê aye yo û hema çi çi çîyan de cinî û carmêdî yewbînan ra girêdayeyî. Enê cumleyî sey mînak wa tîya de bî. Kîşta bîn de dinya de her serre bi hezaran kiştişî yenê meydan. Yanî carmêdî carmêdan zî kişenî. Heta kiştişîya cinîyan ra gelek zafêr kiştişî, cînayetî, zulmî benê.
Esil meselaya ke ez wazena behs bikerî ha tîya de ya ke carmêdî verê ruhê xo badê cinîyan, qijan, carmêdan, xoza û heywanan kişenî. Carmêdî seba çi wina kenî? Çunke destê înan de qewet est o. Yanî binê mesela de carmêdbîyayîş û cinîbîyayîş yan zî qij û heywanbîyayîş çin yo. Zulm, qewet, îqtîdar, hukm û mergê ruhan est o.
Her kesî îlla derdorê xo de dîyo ke cinîyêke yewna cinî kuta û kişta, carmêdî yewna carmêdî ro zulm kerdo û kişto, qijî yewna qijî derb kerdo û kişto, yan zî însanan zulmê heywanan kerdo û kiştî. Yanî bi kilmî carmêdî têna nêkişenî, her kes qasê qewetê xo yew qatîlkar o. Qewet destê kamî de bo o carmêd o.
Wexto ke ena pencera ra biewnîyo mesela ra fehm beno ke qewet destê kamî de bo o kişeno. Qewet destê cinî de bo cinî zî kişena heta cinî carmêdan zî û cinîyan zî kişena, qijanê xo heta dadî û babîyê xo zî kişena.
Carmêd, zulmê cinîya xo keno û kişeno çunke o hîna jîhat o û qewet destê ey de yo. Gama ke keye de nêbo cinî bi qewetî zulmê qijanê xo kena û heta kişena çûnke aye hîna jîhat a û qewet destê aye de yo. Qij wexto ke şino teber embazanê xo rê zulm keno û heta hîna aver şino û kişeno çûnke o hîna jîhat û qewet zî destê ey de yo. Enê însanî xoza û heywanan zî kişenê çûnke hukm ha destê înan de û qewet ha înan de yo. Yanî her kes qasê qewetê xo zulm keno û qasê merdişîya ruhê xo yewê bînî kişeno. Carmêdî ney qewet kişeno.
Seba enê, ziwano ke carmêdî sey şeytanî naweno ney, ziwano ke her tim hetê cinî yo ney, ziwano ke nefret beyntarê însanan de afirneno ney, ziwano nerm û ziwano ke heqîqetê mesela aşîkar keno wa bikar bêro. Tîya ra veng dana heme ajans û sîteyanê kurdan ziwano winayîn ra xo durî bidêne û ziwano ke carmêdan dekeno şeytan bikar mîyarêne.
Zulm û zorbeyîye sey şeytanî nîşan bidêne ke wa ne carmêd zulmê cinîyan û yewna carmêdî bikero û bikişo, ne wa cinî zulmê cinîyan û qijan bikero û înan qurban bikero ne zî wa heywan û xoza qurbanê însanî bibê.
Pehlîwan, o ke eşkeno bi însanan nîyo, pehlîwan, o yo ke eşkeno bi hêrsê xo yo.(Hedîs ra)
11.08.2026
