ZAZAKÎ NEWS - Qezaya Xarpêtî Palî de, bi ameyîşê amnanî û resayîşê tûyan, edetanê en verînan û şîrînan ra yew newe ra ganî bi. Şarê Palî, semedo ke hem hazirîya zimistanî bikero hem zî edetê verînanê xo biciwîno, dest bi girênayîşê helawe (bims-şîrni) kerd. Her serre no wext de, baxçeyanê Palî ra boya şîrîne ya helawe berz bena.
Dewijî, tûyêranê xo ra tûyanê resayeyan arê danê, adirêko pîl wekenê û lênanê (qazananê) girdan de bi saetan înan girênenê heta ke benê şerbetêko şîrîn. No proseso ke bi keda pîle virazîyeno, ne tenya seba zimistanî yew werdê tebîî û biqewet amade keno, belkî eynî wext de merdim û cîranan ano têhetû yewîye keno qewetîn.
"Helawe seba ma hem şîfa ya hem zî mîras o"
Helawe, seba şarê herême tenya yew werd nîya; o eynî wext de yew çimeyê şîfa û parçeyêkê mîrasê kulturî yo. Goreyê bawerîye, helawe zaf nêweşîyan rê baş a û qewet dana leşa merdiman.
Yew cinîya Palîyij, ke tûyanê xo girêneno, hîssîyat û girêdayîya xo ya bi nê edetî wina ana ziwan:
"Eke tûyî wextê xo de nêrê arêdayîş, zîyan benê. Ma zî hem semedo ke berhemê ma zîyan nêbo, hem zî semedo ke edetê kal û pîranê xo rê dewam bike, her serre na xebate kena. Verînanê ma vatêne, 'Zimistanî de her serê sibayî yew kuçikêka helawe-dims biwerê, to rê bena qewet.' Ma zî zimistanî de helawa xo wenê û nê edetî domnenê."
Peynî de, girênayîşê helawe yo ke Palî de her amnan virazîyeno, ramocneno ke girêdayîya însanî ya bi erd û kulturî reyde çiqas xorîn a û senî edetî eşkenê neslan biresnê yewbînan.
