Xebate koordînasyonê Serekîya Daîreya Karanê Baytarî de ame kerdiş. Serekîyanê Daîreyanê Çapemenî Weşan û Têkilîyanê Şarî, Xizmetanê Komelkîyan, Xizmetanê Astengdar û Pîran, Polîtîkayanê Cinîyan û Park û Baxçeyan zî piştî daye. Amanc o yo ke cayanê cîya-cîyayanê şaristanî de heywananê kuçeyan rê werd bêro dayîş û komelî de heskerdişê heywanan û hişyarîya heqê cuye zêde bibo.
‘Pawitişê heqê cuya înan berpirsîyarîya ma ya hempar a’
Doktora baytare Sertap Balkaya, ke Keyeyê Miqateyê Heywanan û Merkezê Rehabîlîtasyonî yê Serekîya Daîreya Karanê Baytarî de xebitîyena, dîyar kerd ke pawitişê heqê cuye yê heywananê kuçeyan berpirsîyarîya heme kesan a. Balkaya vat ke ê derzîne, xesilnayîş, tedawî û operasyonanê cerahîyan ra teber, seba werdê heywananê kuçeyan zî xebitîyenê.
‘Ma waranê werddayîşî awan kenê’
Balkaya vat ke ê seranserê şaristanî de cayanê dîyaran de waranê werddayîşî awan kenê ke heywanê kuçeyan hîna asan biresê mama û awe. Balkaya vat: “Amancê ma tena mudaxele û tedawîkerdişê înan nîyo. Ma wazenê bimojnê ke no şaristan tena ma rê ney, heywananê kuçeyan rê zî şaristanêko weş o ke tede bieşkê biciwîyê.”
‘Ma verê berê xo de qabêkê awe û mama ronê’
Balkaya bale ante zimistanî ser o ke nêzdî beno û venga hemwelatîyan da ke derheqê heywananê kuçeyan de hesas bê. Balkaya vat: “Zimistan yeno. Eke ma verê ber û baxçeyanê xo de qabêkê awa pake û qabêkê mama ronê, no seba ciwîyayîşê înan zaf feydedar beno.”
