ZAZAKÎ NEWS - Bi wesîleya serrgêra 32ine ya Qetlîamê Madimakî yê Sêwasî, hezaran kesî seba ke hem qetlîamî şermezar bikerê hem zî qurbanan yad bikerê, ameyî Sêwas û ver bi Otêla Madimakî kewtî rayîr.
Veşnayîşê Otêla Madimakî ser ra 32 serrî vîyartî. Qêtlîam de 33 kesî, ke zafêrê înan roşnvîr û ozanê Elewîyan bîyî, canê xo daybî. Nê kesî, seba ke tewrê Şayîyanê Pîr Sultan Abdalî bibê, ameybî Sêwas.
Rayraşîyayîş û yadkerdiş
Ewro, seba yadkerdişê 33 hunermend û roşnvîran Otêla Madimakî de yew merasîmê yadkerdişî virazîyeno. Xeylê rêxistinê sivîlî, sendîkayî û welatîyî tewrê yadkerdişî bîyê.
Parlamenteranê CHP û DEM Partî û rayberê partîyan zî tewrê yadkerdişî bîyê.
Pawîyeno ke kome, dima ke bireso verê Otêla Madimakî, verê cû qerenfîlan otêle ver de ronê û dima ra temsîlkarê rêxistinê sivîlan qiseykerdişan bikerê.
Qetlîamê madimakî de se bi?
2yê Temmuza 1993î de, Otêla Madimakî ya Sêwasî, ya ke beşdarê Şayîyanê Pîr Sultan Abdalî tede mendêne, hetê yew koma faşîst ra ame veşnayene. Netîce de, 33 nuştox, ozan û roşnvîrî, pa bi 2 karkeranê otêle reyde, wefat kerd. Qurbanê Qetlîamê Sêwasî her serre bi çalakîyanê cîya-cîyayan yenê yadkerdene.
