Hesabê Xî yê platformê xeberan T24î yo ke 1,9 mîlyon teqîbkerdeyê ci estê bi qerarê mehkeme newe ra ame sansûrkerdiş. Adreso newe yê hesabî zî bi bahaneyê “asayîşê komelî” asteng bi.
Platformê xeberan T24î yo ke verê cû derheqê Înternetê ci de qerarê astengî amebî dayîş, na rey bi rayê hesabê xo yê medyaya sosyal bi qerarêko newe yê mehkeme padîya. Hesabê resmî yê Xî yê platformî yo ke nêzdîyê 1,9 mîlyon teqîbkerdeyî estê, ser o nameyê şuxulnayîşî yê ke ame newekerdene zî ame padîyayîş.
Goreyê agahîyanê ke EngelliWebî dayî, badê adresê “@t24comtr”î yo ke verê cû pîya bi platformî ameyêne şuxulnayene, hesabê newe yê bi nameyê “@t24comtr_”î seba îdîayanê sey “astengkerdişê sûçkerdişî û pawitişê asayîşê komelî” ame astengkerdene.
Seba hesabanê medyaya sosyal yê rojnameyan qerarê astengîye
Sînorê astengîya resayîşî, tarîxê 14ê êlule de ver bi warê rojnamegerîye û heqê merdiman hîra bî. Bi qerarê Hakîmîya Cezaya Sûlhî ya 4. ya Bakırköyî yê tarîxê 13ê êlule, derheqê zaf hesabanê X û Instagramî de ke mîyanê înan de rojnameyê ma Evrensel, soL Haber, Kısa Dalga, Saziya Efî ya Navneteweyî ya Tirkîya, Akademîsyenê Aştîye û Komeleya Cigêrayîşanê Medya û Huquqî (MLSA) û tayê rojnamegerî zî est ê, qerarê astengîye ame girewtene.
Çi bîbî?
Astengîya verêne ya seba Înternetî yê T24î, bi qerarê Hakîmîya Cezaya Sûlhî ya 1. ya Îstanbulî amebî kerdene. Serekîya Serdozdarîye ya Îstanbulî da zanayene ke mîyanê operasyonanê ke hukmatî nameyê ci nawo “keyeyê mi binê pawitişî de yo” de, seba ke 118 xeber û nuşteyê ke mîyanê sîteyî de yê mîyanê xo de “propagandaya LGBTî” tede est a, ameyî kerdene hedefê astengîya resayîşî.
