Şaredarîya Yenîşehîrî ya Amedî bi amancê xurtkerdişê berardiş û paştîdayîşê cinîyan Bostanê Komunî yê cinîyan ke binê banê Merkezê Paştîdayîşê Cinîyan ê Binevş de ameyo awankerdene, şitilê firingîyan û rihanî ronayê. Hemşaredara Şaredarîya Şaristanê Girdî ya Amedî Serra Bucak, Hemsereka DBP’yî ya Amedî Ruçem Vefa Elyakut, Hemşaredarê Şaredarîya Yenîşehîrî Safîye Akdag û Mehmet Ergun, Endamê Meclîsî, Mudurîyetê Polîtîkayanê Cinîyan yê Şaredarî, Meclîsê Cinîyan ê DTSO’yî, Komela Cinîyan a Rosa û xeylî cinî pîya şitilî ronayê.
Amanc o yo ke beşdarîya cinîyan berardişî de zêde biba
Bostanê şitilan de firingî û rihan ameyî ronayene û seba awdayîşî înan xortimê awe ameyê bicakerdene. Seba huşkkerdişê, firingîyê tewirê “Lînda” ameyê ronayene. Cinîyan ca bi ca bi deyîr û tililîyan şitilî ronayê. Bostanê Komunî yê Cinîyan de ke Taxa Uçkuyular a qezeya Yenîşehîrî de 7 donim erdê ser o ameyo awankerdene, amanc beşdarîya cinîyan a berardişê de zêde biba, paştîdayîşê mabenê înan xurt bikero û kulturê cuya hempar aver beno, awan bîyo.
Nê projeyî reyde, ramitişî ra hetanî arêdayîşî perwerdeyê tewir bi tewir cinîyan rê yenê dayene û amanc o yo ke warê berardişê ramitişî de zanayîş û tecrubeyê cinîyan zêde bibê. Sewbîna bostanî de cayê arisîyayîşî û warê xebitnayîşî yê hemparî zî est ê ke cinî eşkenê uca de kombîyayîş û erjnayîşan bikerê û têkilîya xo ya komelkî xurt bikerê.
