Ewro Dîyarbekir de partîyê Kurdistanî bi minasemetê seserîya Pîyameyîşê Lozanî de beyanatî dayê û beyan kerdî ke, Pîyameyîşê Lozanî ke se serrî verî Paytaxtê Îswîçre Lozan de ameyo îmzakerdiş qebûl nêkenê û waştê wa pêro heqê Kurdan bêrê dayîş.
PAK û TDK-TEVGERî Amed de pîya aşkereyîyêk day û vanê “Miletê Kurd heta ewro Pîyameyîşê Lozanî qebûl nêkerdo, ewro zî qebûl nêkeno û do çirey zî qebûl nêkero.”
Ancî, Dîyarbekir de hetê Kongreya Komela Demokratîk (KCD) Partiya Herêmê Demokratîk (DBP) Partiya Demokratîk a Şaran (HDP) Partiya Çepe ya Kesk, Partiya Komunîst a Kurdistanî (KKP) Partiya Însan û Azadî (PİA) Partiya Sosyalîst a Kurdistanî (PSK) Partiya Demokrat a Kurdistan-Tirkiye (PDK-T) Partiya Azadî, Hereketa Azadî, Komeleyê Kurd ê Şoreşger ê Demokratîk (DDKD) Komela Şêx Seîd, Platforma Yewitîya Cinîyanê Kurd ra pîya beyanatêk dîya çapemenî û vajîya ke, ê Pîyameyîşê Lozanî qebûl nêkenê, ganî pêro heqê Kurdan ke Lozan de ameyê çînekerdiş bêrê dayîş.
Pîyameyîşê Lozanî 24ê Têmuza 1923î de bi destê Brîtanya, Fransa, Îtalya, Japonya, Yewnanistan, Romanya, Yûgoslavya û Tirkiya şaristanê Lozanî yê Îswîçre de ame îmzakerdiş.
Bi nê pîyameyîşî Kurdistan mabênê Iraq, Îran, Sûriye û Tirkiya da ame perçekerdiş û parekerdiş.
100 serrîya Pîyameyîşê Lozanî de Kurdî na wesîla ra protestoyanê cîya bi cîyayan tertîp kenê û Pîyameyîşê Lozanî qebûl nêkenê, protesto kenê.
