Serekşaredarê verênî yê Şaredarîya Bajarê Pîlî yê Îzmîrî Tunç Soyer, çarçeweya yew cigêrayîşê derheqê "bêusulîya îhaleyan" û "sextekarîye" de, pa bi 120 kesan reyde ame destbendkerdene.
Goreyê agahîyan, Serdozgerîya Komare ya Îzmîrî, îdîayanê ke şîrketê şaredarîye İZBETONî bêusulîye kerda, cigêrayîşêko hîra dabî destpêkerdene. Na çarçewe de, derheqê 157 kesan de qerarê destbendkerdişî amebi dayene.
Ame zazanayîş ke operasyonê ewroyî de, Serekşaredaro verên Tunç Soyer, Serekê Rêxistina CHPyî yê Îzmîrî Şenol Aslanoglu û tayê rayberê şaredarîye zî tede, pêro pîya 120 kesî ameyî destbendkerdene. Operasyon seba tepiştişê kesanê bînan dewam keno.
CHPyî ra reaksîyon: "No, operasyonêko sîyasî yo!"
Hetkarê Serekê Kome yê CHPyî Alî Mahir Başarirî medya komelkî ser o reaksîyon nîşan da û va ke no cigêrayîş raşte raşt operasyonêko sîyasî yo.
Hetkarê Serekê Pêroyî yê CHPyî Murat Bakanî zî hesabê xo yê Xî ser o derheqê operasyonî de wina nuşt:
"Ma ewro zî bi yew operasyonê serê sibayî (şefaqî) hîşyar bî. Îzmîr de, serekşaredarê ma yo verên Tunç Soyer, burokratê ê demî yê payeberzî û serekê ma yê Îzmîrî Şenol Aslanoglu serê sibayî ameyî destbendkerdene.
Ma bi yew prosesê sey yê Îstanbulî vînenê. Wexto ke merdim nameyanê kesanê ke ameyê destbendkerdene ra ewnîyeno, vîneno ke îdîayê derheqê înan de, meseleyê ke demêko derg o raya pêroyî de yenê qiseykerdene yê, û zaf rey eşkere bîyê ke înan ser o cigêrayîş virazîyayo yan zî meydanê sîyasî de ameyê munaqeşekerdene.
Şupheyê remayîşî çinî yo. Adresê nê kesan bellî yê, ê kesê ke her roje verê çimanê şarî de yê. Eke seba îfadeyî venga înan bîdîyêne, elbet do şîyêne."
