ZAZAKÎ NEWS - Şewirmendê Serekkomarê Tirkîya Mehmet Uçumî vat ke semedê demokrasî û huqûqî de reformê hîrayî bêrê kerdene.
PKK qerarê kongreya xo ya 12ine eşkera kerdî ke tede vajîya ke PKK xo fesix kerda, têkoşîna çekdarî qedîyaya û pêroyê xebatê ke nameyê PKK de bîyêne peynî bîyê.
Mehmet Uçum o ke şewirmendê Serekkomarê Tirkîya Recep Tayyîp Erdoganî yo, badê nê xeberan hesabê xo yê Xî ra yew beyanato nuştekî vila kerde.
Uçumî va: "Kurdî û Tirkî pîya Komara Tirkîya awan kerdê. Kurdî unsurê eslî yê awankerê miletê Tirkî yê. Kurdî sey yew parçeyo ke cîya nêbeno, awanker û wayîrê Komara Tirkîya yê. Komara Tirkîya dewleta neteweyî ya Kurdan a zî ya. Seserra Tirkîya, seserra Kurdan û Tirkan a."
Mehmet Uçumî îfade kerd ke seba Tirkîya "demêko tarîxî" dest pê keno û vat: "Serdemê newe do Tirkîya her hetî ra hîna xurt biko. Warê demokrasî û huqûqî de reformê hîrayî do bêrê kerdene û ma do derbazê qonaxêko newe bibê ke demokrasî û huqûq tede bibê."
