Dewa Bore serra 1987î de resa elektrîkî labelê mezrayê Dere Elî û Dere Çetî yê ke girêdayeyê dewe yê, serranê dergan xizmetê elektrîkî ra bêpar mendî. Roniştoxê mezra, dima vengkerdişê dewan ê serranê 1993-1994î de ameyî meydan zî mexdûrîyetêko pîl dî.
Muxtarê dewe Haydar Gulî va ke heta serra 1994î herême de bi desan banî estbî la dima vengkerdişan dewe hema hema bêkes mende. Gulî va ke wexto ke ê serra 2002yî de agêrayî, banî pêro rijîyaybî.
Muxtarê Dewa Bore (Çıralı) Haydar Gulî va ke ê bi serran o seba resnayîşê elektrîk û awe ya herême micadele kenê û nê çîyî vatî:
“Seserrêke ra dima roşnî ameye na dewe. Heta serra 1994î tîya de cuye estbîye, bi desan banî estbî. Serra 1994î de yew roje de her ca ame vengkerdiş. Serra 2002yî de wexto ke ma agêrayî û ameyî, kemere ser o kemere nêmendbîye. Nika serra 2026î de Dere Elî de elektrîk vêşeno. Nê ra pey her kes do heywandarîye biko, berardiş biko. Çîyê ke ma verê cû berardêne, seba ke elektrîk çin bi pêro şiyêne çop.”
“Edî ma do bieşkê her ca bivînê”
Îbrahîm Aksoyî va, teqrîben 20 serrî yo hinganê xo ano herême la problemê elektrîkî cuya înan a rojane kerdêne zehmet.
Aksoyî wina qisey kerd: “20 serrî ra nata ma hinganê xo anê tîya. 20 serrî ra nata zî ma tîya de mîyanê tarîyî de cuyenê. Ma nêeşkenê verê xo bivînê, heşî yenê. La nika elektrîk ame, şukir bo, ma telefonanê xo şarj kenê. Her ca do bibo roşn, heşî zî nêyenê. Ma do bieşkê her ca bivînê. Verê cû wina nêbi.”
“30 serran ra dima ma ameyî tîya û ban viraşt”
Yoldaş Yilmazo ke Almanya ra agêra dewe û banêk viraşt zî va ke xebatê elektrîkî înan rê bawerîye dana.
Yilmazî va: “Cesaret ame ma. Çunke bêelektrîk, mîyanê nê birrî û koyan de, tarî de, mîyanê mar û vergan de nêyeno cuyayene. Ma zî bîyî bicesaret, 30 serran ra dima ma ameyî tîya û ban viraşt. Elektrîk ame. Înşallah ê ke teberê welatî de yê zî agêrenê warê xo û banan virazenê.”
Bi temambîyayîşê xebatanê xeta elektrîkî roniştoxê mezraya pawenê ke şertê cuye bibê baş, heywandarîye û xebatê berardişî reyna ganî bibê.
